Katea-Plaiaundiko korridore ekologikoaren ordenaziorako ikerketa bat hasi du udalak
Aldundiak emandako subentzio batekin egingo dute ikerketa. Trenbide eremuaz gain, inguruan egin daitekeenaren argazki bat atera nahi du udalak, etorkizuneko Via Irun fintzeko.
Irungo argazki panoramikoa. Irungo Udalak jakinarazi berri duenez, dagoeneko Katea-Plaiaundiko korridore ekologikoaren ordenaziorako ikerketa batean ari dira lanean. Urte hasieran onartu zituen udalbatzak Via Irun proiektuaren ordenaziorako irizpide eta helburuak, eta akordio honi esker, udal gobernuak konpromisoa hartu zuen trenbide eremuaren ordenazioa ikertzeko Kateatik Plaiaundiraino doan korridorearen barruan.
Udalbatzak onartu zuenetik albiste on ugari izan direla gogoratu du udalak, hala nola, Zaisaren estatus aldaketa Via Irun proiektua gidatzeko edota Adif-ek emandako aurrerapenak.
Bada, orain, Katea eta Plaiaundi arteko trenbide eremuaren ordenaziorako ikerketa baten erredakzioa enkargatu du. Honetan, gerora Adifi-i helarazteko proposamenak bilduko dituzte. Trenbide eremuaz gain, inguruan egin daitekeenaren argazki bat atera nahi du udalak, etorkizuneko Via Irun hori fintzeko.
Ikerketarako aldundiaren subentzio bat jaso du udalak, zehazki 75.000 eurokoa.
