Inauterietako XI. Erakusleiho Lehiaketa deitu du udalak
Jai ekitaldirik ez dela egongo berretsi du udal erakundeak, nahiz eta Turismo eta Merkataritza departamentuak txapelketa mantendu nahi izan duen.
2018ko Inauterietako erakusleiho lehiaketan parte hartutako komertzioa.
Hondarribiko 2021eko Inauterietako XI. Erakusleiho Lehiaketa deitu du gaur udalak. Aurtengoan, Inauteri ekitaldirik egongo ez dela berretsi duen arren, Turismo eta Merkataritza departamentuak deialdia mantendu nahi izan duela gaineratu dute.
«Jakin badakigu zein egoera bizitzen ari garen, baina ahal den neurrian bizitzen ari garen momentu kaxkarra pixka bat arintzeko asmotan antolatu dugu aurtengo lehiaketa», azaldu du Maria Serrano arloko zinegotziak.
Izena emateko interesa duten saltokiek, BAZen egin beharko dute, eta gehienez, etzi arratsaldeko 18:00ak arteko epea izango dute horretarako. Erakusleihoen apainketak hilaren 11tik 16ra bitartean ikusgai egon behar du.
Sariei dagokienez, bi kategoria egongo direla zehaztu du zinegotziak: lehena, epaimahaiaren balorazioaren emaitza gisa, eta bigarrena, herritarrek Instagram eta Facebook sare sozialetan aukeratutakoa.
