Txirrindularien segurtasuna areagotzeko neurriak aldarrikatu ditu Balaztak
Bizikletaren Aldeko Bidasoko Elkarteak abiadura neurketak egin zituen abenduan, eta ibilgailu «askok» abiadura muga gainditu zutela salatu du. Ikastetxeetan kanpaina ere abiatu nahi du elkarteak.
Txirrindularien segurtasuna bermatzeko abiadura txikiko espazioak aldarrikatu ditu Balaztak. 
Balazta Bizikletaren Aldeko Bidasoko Elkarteak azken asteotan aurrera eramandako ekintzen berri eman du komunikabideetara igorritako ohar baten bidez. Taldekideek jakinarazi dutenez, «eskualdean bizikletaz mugikortasun segurua lortzea» da abiatutako dinamiken helburu nagusia.
Lehenik eta behin, Irungo Kolon pasealekuan eta Hondarribiko Baserritar etorbidean aurrera eramandako neurketen ondorioak ezagutarazi ditu taldeak. Abenduaren 22an eta 23an orduko 30 kilometroko abiadura muga duten bi errepide horietan egindako neurketen arabera, «motordun ibilgailu askok ezarritako gehieneko abiadura muga gainditzen dutela orduko 20 kilometrora arte» konprobatu du taldeak. «Abiadura txikiko eremuak ezartzea txirrindularien segurtasuna hobetu dezakeen neurria da, baina neurria berez nahikoa ez dela dirudi», ondorioztatu dute.
Bestalde, ikastetxera bizikletaz joaten direnen artean kanpaina abiatu zuten urtarrilean. Egunsentia neguan zehar ikasleak klasean daudenean ematen da, eta beraz, oraindik ere ilun dagoenean «trafiko ugaria duten errepideetan ibili behar izaten dute». Egoera ikusirik, urtarrilaren 18an Talaia institutuko ikasleen artean argiak banatu zituzten. Iniziatiba «eskualdeko ikastetxe guztietara» zabaldu nahi du elkarteak.
Azkenik, eserlekuen azpian Bidegorriak Orain! dioen aldarrikapen plakak ere sortu dituzte eta 2 euroren truke eskualdeko zenbait saltokietan eskura daitezke, besteak beste: Irungo Arbelaiz, Artia, Cyclope, Jaizkibel eta Santiagon, eta Hondarribiko Arretxe, BiziOnBike eta Higerren.
