Hondarribiko EAJ: "Ekintza horien atzean gizartearekiko desafekzio argia duen jendea dabil"
EAJri eta Ertzaintzari egindako mehatxuak direla esan dute, "onartezinak eta demokraziaren aurkakoak dira. Asmo mafiosoa dute".
Argazkia: Twitter, @mahoneiFP Gaur herrian agertu diren pintaketen harira, gaitzespen mezua zabaldu du Hondarribiko EAJk sare sozialen bidez. Pintaketen atzean “gaur egun gizartearekiko desafekzio argia duen jendea” dabilela adierazi dute Hondarribiko Uri Buru Batzarreko kideek, «gizarteak bizi duen pandemia une hain zailekiko enpatia eskasa duen gutxiengo bat ordezkatzen duena”. Aldi berean, EAJri eta Ertzaintzari zuzenean egindako mehatxuak direla esan dute, “onartezinak eta demokraziaren aurkakoak dira”.
Hondarribiko EAJren arabera “asmo mafiosoa” dago pintaketen oinarrian. Baina haien ustez, “hondarribiarren gehiengo zabala” ez dator bat horiekin, “gehiengo zabal horrek, dagoeneko, jarrera ekintzaile eta solidarioaren aldeko apustua egiten duelako. Hori da Hondarribiko EAJk aukeratu duen jarrera eta bidea”.
“Eguneroko lan diskretua” eta herriko eragile sozialekin elkarlanean aritzea goretsi dituzte jeltzaleek, eta koronabirusari aurre egiteko lanean dabiltzanei esker mezua helarazi nahi izan diete, “ez da tentsio eta krispazio gehiago gehitzeko unea. Nahiago dugu esker oneko mezuak zabaldu”.
