Segurtasun tarteak bermatzeko garbiketa lanak egin dituzte Talaia institutuaren inguruetan
Hezkuntza Sailaren eskumena izan arren, ikastetxearen atzealdean kokatutako mendi hegala garbitu eta egokitu du udalak.
Talaia institutuaren inguruak garbitu ditu udalak. 
Hainbat garbiketa eta egokitze lan egin ditu Hondarribiko Udalak Talaia institutuaren inguruetan, Juan Luis Silanes Hezkuntza zinegotziak jakinarazi duenez. Aisialdira bideratutako denbora tarteetan osasun segurtasun neurriak ahalik eta hobekien betetzea du helburu esku hartzeak.
«COVID-19a dela-eta hartu behar izan diren segurtasun eta distantzia neurriak bermatzen laguntzeko, Talaia institutuko ordezkariek ikastetxearen atzealdeko mendi hegala garbitu eta egokitzea behar zutela» adierazi zioten udalari. Hortaz, eskumena Hezkuntza Sailarena izan arren, «egokitzat» jo du udal erakundeak «lan azkar batzuk egitea», eta era horretan, «ikasleek aisialdian leku gehiago izatea», amaitu du Silanesek.
