Irunen ere euskaraz 'gehiago, gehiagorekin eta gehiagotan' aritzeko prest
Ostiralean hasiko den Euskaraldiaren harira egitarau zabala antolatu du Irungo Udaleko Euskara sailak. Hilaren 25etik abenduaren 5era bitarte luzatuko dute eskaintza.
Aurtengo Euskaraldia biribiltzeko egitarau berezia antolatu du Irungo Euskara Sailak. Ariketa soziala ostiral honetan (hilak 20) hasi arren, hilaren 25etik (asteazkena da) abenduaren 5era bitarte luzatuko dituzte ekintzak, gaur Monica Martinezek ordezkariak jakinarazi duenez. Guztietan neurri zorrotzak ezarriko dituzte, egungo osasun egoera dela eta.
«Euskara Irungo plazetan nahi dugu, indartsu eta sendo, euskara, hizkuntza erabilia eta bizia izatea. Eta honek guztion gogoa eta ahalegina eskatzen du: norbanakoei eta kolektiboei», esan du Martinezek gaurko agerraldian.
Honakoa da datozen asteotarako antolatu duen egitaraua:
- Hilak 25 (asteazkena): Txor Txor umorezko bakarrizketa eskainiko du Nerea Arriolak Amaia Kultur Zentroan. «Euskaldunok eguneroko egoeretan euskararekiko ditugun harremanei buruzko gogoeta» egingo du.
- Hilak 27 (ostirala): Ene Kantak talde nafarrak familientzako Liluragarria, gorputz barrura goaz ikuskizuna taularatuko du, 18:00etan, Amaia Kultur Zentroan. Abesti eta koreografien bitartez, Nere eta Eneko pertsonaiek leku liluragarri bat ezagutuko dute.
- Hilak 28 (larunbata): Glu Glu taldeak Mari Errauskin familientzako antzezlana eskainiko du, 17:00etan.
- Hilak 28 (larunbata): Bentazaharreko mutiko alaien eskutik, Kantujira saioa eskainiko dute 18:00etan, Musika Eskolako auditorioan.
- Hilak 29 (igandea): Axut! Artedrama eta Dejabuk taldeek ekoitzitako Zaldi Urdina ikuskizuna eskainiko dute 19:00etan Amaia KZn.
- Abenduak 1 (asteartea): Zoaz Pake Santuan helduentzako antzezlana taularatuko dute.
- Abenduak 3 (osteguna): Euskaren Nazioarteko Egunerako bertso saio berezia antolatu dute Amaia KZko areto nagusian. Oihana Bartra, Julio soto eta Maite Berriozabal bertsolariak ariko dira.
- Abenduak 5 (larunbata): Laburbira saio bat egingo dute euskarazko film laburren XVII. Zirkuituarekin. Emanaldiaren ondoren, Kateak film laburraren zuzendari Yolanda Mazkiarekin solasaldia izango da.
Saio guztiak doakoak izango dira, Mari Errauskin antzezlana izan ezik (4,40 euro ordaindu beharko dira). Gonbidapenak turismo bulegoan edo Amaian bertan eskuratu beharko dira. Halere, Kantujirarako eta Laburbirarako aldez aurretik izena eman beharko da, helbide honetara idatziz.
Udaleko ordezkariak gaineratu duenez, «programazio honek zentzu handiagoa izango du egun hauetan guztietan euskaraz gehiago, jende gehiagorekin eta gehiagotan hitz egiten badugu; eta hau guztia urteko gainerako egunetara zabaltzen badugu». Amaitzeko, oraindik aurtengo Euskaraldian izena eman ez dutenei apuntatzeko deia egin die. Esteka honetan egin daiteke, bihar arte.