Etxetik bisitatu beharko da aurtengo Be Veggie azoka
Online bidez jarraitzeko edizioa antolatu dute. Abenduaren 5 eta 6an egingo dute, Ficoban.
Iazko azokan bildutako irudi bat. Beganoek zita garrantzitsua izango dute abenduaren 5 eta 6an, Be Veggie jaialdi beganoa Ficobara itzuliko baita. 2019an eskuratutako emaitza onek beste urte batez errepikatzera animatu ditu antolatzaileak. Halere, aurtengoa berezia izango dela iragarri berri dute. Izan ere, soilik online bidez jarraitu ahalko da, egungo osasun egoerak ez baitu baimentzen. Instagram sare soziala baliatuko dute horretarako.
Online bidez izan arren, helburu berbera izango du aurtengoak ere: «pertsona beganoak biltzea, kontsumitzeko modu hori aukeratu dutenak, bai eta elikadura eta kontsumo alternatibak bilatzen dituztenak ere», esan dute antolatzaileek.
Beraz, aurtengo honetan online katalogo baten bitartez landareekin %100ean elikatzeko eskaintza eta pertsona beganoentzat egokiak diren produktu eta zerbitzuak ezagutaraziko dituzte. Horretarako, sukaldari eta nutrizionista profesionalak izango dituzte alboan bisitariek. Jakiak nola prestatu ikasiko dute edo kosmetika beganoaren munduan lehen pausoak eman ditzakete.
Hitzaldiak izango dira aurten ere plater nagusiak. Hala, lehenean Oscar L. Sanchezek Diario de un activista liburua aurkeztuko du, Julia Jimenezek No se que cenar liburua eta Patricia Menendez blogariak plater beganoak prestatzen irakatsiko du. Bestalde, Sara Gomez Marquinak ekintzailetza kontzienteaz hitz egingo du bere hitzaldian.
Egitaraua oraindik lantzen jarraitzen dutela zehaztu dute antolatzaileek, beraz, datozen egun eta asteetan fintzen joango direla. Informazio gehiago, esteka honetan kontsulta daiteke.
