Azken neurri murriztaileak ezagutarazi ondotik, tokiko merkataritza, ostalaritza eta kulturaren sektoreen gaineko kezka agertu du koalizio abertzaleak.
Merkatariek, ostalariek eta kultur eragileek bizi duten egoerarekin kezka agertu du EH Bilduk. 
Koronabirusaren hedapena geldiarazteko indarrean sartutako neurriek gehien kaltetzen dituzten sektoreen inguruko kezka adierazi du Irungo EH Bilduren udal taldeak. Egoerari aurre egiteko, tokiko merkataritza, ostalaritza, eta kulturaren sektoreen aldeko “apustu estrategiko argia” galdegin die Eusko Jaurlaritzari zein Irungo PSE-EEren udal gobernuari, “diru-laguntza zuzenak eta epe luzerako plangintza sakona uztartuz”.
Era berean, “beharrezko politika publikoak” martxan jarri ahal izateko, eragile ezberdinekin biltzea eta haien kezkak gertutik entzutea ezinbestekoa iritzi dio koalizio subiranistak.
Hori horrela, tokiko merkataritzaren alde egitea erabakiz gero, Zaldunborda bezalako makroproiektuak alboratzea ezinbestekoa ikusten dute taldekideek. Kulturaren kasuan, eragileekin batera “bide eta formatu berriak bilatzeko una da”, EH Bilduren iritziz. Eta ostalaritzari dagokionez, sektorea laguntzeko proposamen zehatza aurkeztu zuela koalizio abertzaleak gogoratu dute.
Azkenik, Europako diru-funtsak udaletara iristea beharrezkotzat jo du udal alderdiak, eta ez liratekeela “enpresa handien eta makroproiektuen beharrak asetzeko bideratu beharko” erantsi du.
Bidasoari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako. Herrigintza egin nahi dudalako. Bidasoko euskarazko komunitatearen parte izan nahi dudalako. Bidasoak eta bidasoarrok behar dugulako. Zure ekarpena behar dugu, babestu tokiko euskarazko komunikabidea.
