Bidasoak Cangas de Morrazo jipoitu du
Azken bi urteetan porrotarekin itzuli dira handik Bidasoako jokalariak, baina atzo ordea, inoizko emaitzarik onena eskuratu zuten, 13 goleko errenta. Asobal ligako lehen partida izan zen.
Asobal liga primeran hasi du Bidasoa eskubaloi taldeak. Cangas de Morrazo taldea jipoitu zuen atzo (hilak 8) talde irundarrak ligako lehen neurketan, O´Gatañalen, 22-35 irabazita. Azken bi urteetan porrotarekin itzuli dira handik Bidasoako jokalariak, baina atzokoan ordea, maisuki nagusitu ziren. Talde galiziarraren aurka inoizko emaitzarik onena lortu dute, 13 goleko errenta, klubeko errekorra ezarri dute.
Partidaren hasieran etxeko taldea nagusitu zen, baina atsedenaldira sei goleko aldearekin heldu ziren bidasoarrak, bereziki Kauldi Odriozolaren golei esker. Bigarren zatia Irungo taldeak gidatu zuen osorik, eta errenta handitzea lortu zuen Bidasoak. Xoan Ledo atezainak ere sekulako partida jokatu zuen atzo, ia jaurtiketen %53a gelditu zituen.
Atzokoa ligako bigarren jardunaldia izan zen, baina jokatutako lehena Bidasoarentzat, izan ere, osasun larrialdiagatik lehen eta hirugarrena atzeratu dituzte.
Larunbatean izango dute hurrengo hitzordua, Euskal derbian. Larunbatean, 20:00etan, Anaitasunaren aurka ariko dira Iruñean. Partida hau, zehazki, ligako laugarren jardunaldia izango da.
Honakoa da atzoko fitxa teknikoa:
Bidasoa Irun (20+15): Sierra, Kauldi Odriozola (5), Donát Bartók (7), Julen Aginagalde (1), Azkue (1), Racotea (2) eta Crowley (4); Xoan Ledo, Mikel Zabala, Eneko Furundarena (1), Iker Serrano (5), Sergio de la Salud (3), Rodrigo Salinas (5), Bonanno (1) eta Matheus da Silva.