Ama Xantalen eguna medio, egun osoz ermita bisitatzeko aukera izango da
Tenpluaren barrualdean kokatutako erakustaretoa eta nekropolia bisitatu ahal izango dituzte herritarrek datorren asteartean egingo duten ate irekien jardunaldian.
Ama Xantalen ermitaren barrualdea, erakustaretoa eta nekropolia. 
Hilaren 18an, asteartearekin, Ama Xantalen eguna dela eta, izen bereko ermita barrutik ezagutzeko aukera izango dute herritarrek egun osoan zehar. Barrualdean kokatutako erakustaretoa eta nekropolia ikusgai izango dira, 10:00etatik 20:00etara bitartean, debalde.
Ama Xantalen ermita Irunen dagoen aztarnategi nagusienetakoa da. K.o. I. mendeko erromatar tenplu baten aztarnak daude bertan, baita nekropoli indigena batenak ere. Gipuzkoan aurkitu den X. mendeko eliza bakarra ere da Ama Xantalen. Egun, Oiasso Erromatar Museoaren bigarren eraikina da.
Bisitariak hitzordurik gabe hurbildu daitezke ermitara, han bertan COVID-19 gaitzaren aurkako protokoloa aktibatuta egongo baita, Irungo Udalak jakinarazi duenez.
