50. urteurrenerako motorrak berotzen hasi dira
San Inazio egunarekin batera ekitaldia egin zuten Hondarribia Futbol Elkarteko zuzendaritzak eta presidente ohiek Alameda jatetxean.
Hondarribia Futbol Elkarteak Alameda jatetxeko Gorka Txapartegiri oparitutako idatzia.
Futbol talde bat osatzeko helburuarekin 1971. urteko ekainaren 11n hainbat elkartetako ordezkariak elkartu ziren Alameda tabernan. Hondarribia Futbol Elkartea sortu zuten ordezkari haiek orain dela mende erdi. Hain zuzen, 50. urteurrena ospatuko du klubak 2021ean, eta hori aurreratzen joateko helburuarekin, ekitaldia egin zuten San Inazio egunean gaur egungo zuzendaritzak eta presidente ohiek Alameda jatetxean. Bertan, klubaren fundazioaren idatzia opari modura eskaini nahi izan zioten Gorka Txapartegi jatetxeko sukaldari ospetsuari. Kontent ekitaldiarekin, 50. urteurreneko xehetasunak pixkanaka iragartzen joango da kluba.
