'Meeting Point' Ertza konpainiaren kale ikuskizuna etzi iritsiko da Hondarribira
Max Arte Eszenikoetako Espainiako kale ikuskizun onenaren saria eta Leioako Umore Azokarena jaso ditu dantzaldiak 2018an eta 2017an, hurrenez hurren.
Ertza konpainiaren 'Meeting Point' ikuskizunaren irudia. 
Kultur agenda itzuli da Hondarribira, eta horrekin batera, zuzeneko emanaldiak ere. Bihar hasiera emango zaie udako kutul ekitaldiei MendiTour Hondarribia jaialdiarekin, eta etzi, igandearekin, Ertza dantza eta antzerki konpainiaren Meeting Point ikuskizunaren txanda izango da. Hitzordua Kasino Zaharreko lorategietan finkatu dute, 12:30ean, eta sarrerak edo gonbidapenak aldez aurretik lortzea ezinbestekoa dela gogorarazi dute, Kutxabank-en edo Arma Plaza informazio gunean.
Max Arte Eszenikoetako Espainiako Kale Ikuskizun Onenaren saria jaso zuen emanaldiak 2018an; Leioako (Bizkaia) Umore Azokak 2017an aitortutako errekonozimendu bertsua 2017an. Sinopsiaren arabera, “herrialde beretik, baina elkarren artean urrun dauden bi hirietatik datozen bi gaztek 8.000 kilometroko ‘putzua’ gurutzatu behar izan dute eta urte batzuk pasatzen utzi, planetaren beste punta batean topatu, elkar ezagutu, eta elkarren loturak aurkitzera iristeko”.
