Ikasgelatik kanpo ere, euskaraz
Aste honetan hasi dute eskolatik kanpo euskararen erabilera sustatzeko asmoa duen Solas Jolas programa. 4-10 urte bitarteko 267 haurrek eman dute izena.
267 haur apuntatu dira aurtengo Solas Jolas programara. Aste honetan abiatu dute hiriko haurrek 2020ko Solas Jolas programa, gogoz gainera. 4-10 urte bitarteko haurrek ikasgelatik kanpo ere euskaraz aritzeko aukera dute aurten ere, goiz entretenigarri bezain dibertigarri bat pasatuta. Guztira, 267 haurrek parte hartuko dute aurtengoan.
Halere, aurtengoa berezia izaten ari da. COVID 19ak eragindako egoerari egokitu behar izan dute aurtengo eskaintza, ezohiko neurriak hartu ditu Euskara sailak. «Zalantzarik gabe, orain arte ez bezalako edizioa da. Familientzako eskaintza horri eusten diogu, ikastaroa amaitutakoan euskara giro lasaian, atseginean eta aisialdian praktikatzen jarraitzeko aukera ematen duen programa batekin», adierazi du Euskara arloko ordezkari Monica Martinezek.
Osasun egoera berrira egokitzeko, gehienez sei laguneko taldetan banatu dituzte HHko haurrak; LHkoak aldiz, zortziko taldetan ari dira. Gainera, ez dira ohiko txangoak izaten ari, hirian zehar arituko baitira haurrak. Egunero haurrei tenperatura hartzeko gonbita egin diete gurasoei, eta guztiak maskararekin joatea beharrezkoa dela gogoratu dute.
