«Gizalegearen aurkako jarrerak jasan behar izan ditugu auzotarrek sanmartzial jai hauetan»
Alde Zaharra-San Juan Auzo Elkartea haserre azaldu da aurtengo jaietan emandako zenbait egoerekin. Udalak hartutako neurriek eragin gutxi izan dutela salatu dute, eta ekainaren 20, 26, 27 eta 30ean aurreko urteetako irudi berbera errepikatu zela.
Irundar batek Legia kalean grabatutako bideoak eztabaida eragin du azken egunetan. Alde Zaharra-San Juan Auzo Elkartea sanmartzialetan emandako masifikazio eta jarrera desegokien gaineko irakurketa elkarbanatu du irundarrekin. «Beste behin ere, gure kale eta plazek gainezka egin zuten aurrekaririk gabeko osasun krisi batean murgilduta egotearen astungarriarekin, eta auzokoek gizalegearen aurkako jarrerak jasan behar izan genituen herritar askoren aldetik San Pedro eta San Martzial jai hauetan», esan dute amorruz.
Azken egunotan auzotarren kexa ugari jaso dituztela esan dute hedabideei bidalitako ohar batean. Horregatik, Irungo Udalari informazioa eskatu diote auzo elkarteko kideek, «ekainaren 19tik uztailaren 1era bitartean hartutako salbuespenezko neurriei buruz, bai eta bide publikoan zarata, botiloi eta pixa egiteekin lotuta egindako jardueren eta salaketen zerrenda, COVID 19aren aurreko segurtasun arauak ez betetzea, eta gizalegearen aurkako jokabideak ere».
Urtero elkarteak komunikatu bat kaleratzen duela gogoratu dute, jaien atarian, bizikidetzaren aldeko mezuekin. Baina, aurten, beharrezkoa izango ez zela ondorioztatu zutela kontatu dute. «Baina ekainaren 24a baino egun batzuk lehenago, ustekabean ikusi genuen gure udalak jai egitarau bat argitaratzen zuela eta hiria prestatzen zuela jende pilaketak hartzeko: kale mozketak, gaueko autobusak… Zertarako, ofizialki jairik ez bazegoen?», erantsi dute auzotarrek.
Neurriek eragin gutxi izan dutela salatu dute, eta ekainaren 20, 26, 27 eta 30ean aurreko urteetako irudi berbera errepikatu zela, «beste edozein urte normal batean bezala». Udaleko agintarien aurreikuspen ezak bizikidetza oreka gainditzea ekarri zuela diote. «Zoritxarrez, ez da egoera berria auzo honentzat, baina oraingoan estatuko hedabideek mundu mailako pandemiak areagotzen duen errealitatean jarri dute begirada. Zer ari da huts egiten gure hirian?».
Amaitzeko, gogoratu dute azken urteetan udalarekin batera Ostalaritza Mahai bat eratzea lortu dutela, eta zenbait gogoeta elkarbanatu nahi izan dituzte udal gobernuarekin: «Zergatik ez zuen udalak mahai hau deitu ustezko ezjai hauen aurreikuspenen aurrean? Non geratzen da auzo elkarte honen eta auzoko ostalaritzaren lankidetza bultzatzeko udalak hartutako konpromisoa? Non zeuden ustez hartutako segurtasun eta osasun neurriak?».
