Mozio bat aurkeztu du Elkarrekin Podemosek, hirian doako maskarak banatzeko proposamenarekin
Erabiltzea derrigorrezkoa den arren, oraindik ere maskarak ordainpekoak direla salatu dute. «Maskara horiekin hornitzeak gastu handia ekarriko du familia askorengan».
Elkarrekin Podemos-Ezker Anitza udal taldeak mozio berri bat aurkeztu du gaur udalean, Irunen doako maskarak banatzeko proposamenarekin. Hedabideei bidalitako ohar batean nabarmendu dute maskarak erabiltzea beharrezkoa dela segurtasun distantzia bermatzen ez den kasuetan, baina «tamalez», maskarak ez direla doakoak. «Maskara horiekin hornitzeak gastu handia ekarriko du familia askorengan», salatu dute. Horregatik eskaera zuzena egin diote udal gobernuari: irundar guztiak maskarez hornitzeko neurriak hartzea. Gaur aurkeztutako mozioa datorren hilaren 29ko osoko bilkuran eztabaidatuko dute.
Lehenik, udalari hiriko puntu estrategikoetan maskarak eta alkohol hidrogela eskuragarri izango duten makina automatikoak ezartzea eskatu diote (Irun Txartelarekin funtzionatuko luke gailuak). Bestalde, Eusko Jaurlaritzari bi eskaera egin dizkiote taldetik. Batetik, maskara kirurgikoak diruz laguntzea eskatu dute, e-errezetaren bitartez, «biztanle guztientzat irisgarria den farmazia sarean jaso ahal izateko». Bestetik, FFP2 motako maskarak aurretiazko arazoak dituzten pertsonei banatzea eskatu dute.
