Mugikortasun iraunkorrean aurrera egiteko hamar proposamen aurkeztu dizkio Balaztak udalari
Osasun larrialdi egoera "mugikortasun ohiturak aldatzeko aukera" dela iritzi dio elkarteak, eta ihes egin aurretik "neurri ausartak" hartzera gonbidatu du udala.
Balazta elkarteak hamar proposamen aurkeztu dizkio Hondarribiko Udalari. 
Osasun larrialdi egoeraren aurrean bizikletaren alde egitera deitu zuen Balazta elkarteak hil honen hasieran. Ildo horretan, Hondarribiko Udalarekin bilera egin du gaur (hilak 22) bizikletaren aldeko Bidasoko elkarteak, eta hamar proposamen helarazi dizkio mugikortasun iraunkorrean aurrera egin dezan. COVID-19 gaitzak eragindako krisia “mugikortasun ohiturak aldatzeko aukera” dela uste du elkarteak, baina “berriz ere, ihes egiten” ari dela deitoratu du.
Hortaz, “neurri ausartak” hartzeko galdegin dio Balaztak udalari,”autoek berriro kaleak hartu eta dena zailago egin baino lehen”. Izan ere, “esperimentatzeko” unea dela arguditau dute elkarteko kideek, “bizikleten mugikortasunari buruzko proiektu ausartak aho batez garatzeko”. Mugikortasun planak zehaztutako oinarriei jarraipena emanez, “zer nolako hiri mota nahi dugun erabakitzera mugatzen da dena”.
Bertan irakur daiteke Balazta elkartearen proposamena bere osotasunean.
