Online munduan trebatzeko ikastaroa jasoko dute hiriko merkatariek
'Eta orain zer? Merkataritza erresilentea' titulupeko hitzaldia eskainiko du Nerea Urkola psikologo adituak Zoom plataforma baliatuz, ostegunean.
'Argia, bizitza eta merkataritza'. Argazkia: Miguel Becerra Jaramillo. Irungo merkatariek online munduan trebatzeko beste ikastaro bat jasoko dute ostegunean (hilak 21). Eta orain zer? Merkataritza erresilentea titulupeko hitzaldia eskainiko du Nerea Urkola psikologo adituak Zoom plataforma baliatuz, 14:00etatik 15:30era. Parte hartzeko, esteka honetan izena eman beharko da.
«Pertsona batek edo talde batek ezbeharren aurrean bere onera etortzeko duen gaitasuna da erresilentzia, etorkizuna proiektatzen jarraitzeko. Premisa hori kontuan hartuta, hitzaldiak lagungarria izan nahi du une honetan saltoki txikientzat, automotibazioa lantzeko eta erresilientziaren ikuspuntutik etorkizunari baldintza hobeetan aurre egiteko tresnak emateko», diote udaleko iturriek.
Ikastarorako 25 plaza daudela zehaztu du udalak, eta izen ematearen arabera esleituko dituzte. Ikastaroaren gaineko informazio eta xehetasun gehiago, 943 50 96 00 telefono zenbakira deituz edo helbide honetara idatziz eskura daiteke.
