San Isidro egunaren historia ezagutzeko aukera Arma Plazaren eskutik
Bihar ospatuko dute nekazariek haien patroiaren eguna, baina ohiko ospakizunak aurrera eramateko debekua dela eta, gonbidapen berezia luzatu die Arma Plaza fundazioak hondarribiarrei.
San Isidro eguneko prozesia Guadalupeko zelaian. 
San Isidro eguna ospatuko dute Hondarribiko nekazariek bihar, hilak 15, ostiralarekin. Larrialdi egoerak ezarritako itxialdia eta debekuak medio, aurten baserritarrek ezingo dute ohiko moduan ospatu haien patroiaren omenezko eguna. Hori dela eta, Arma Plaza fundazioak Juan Antonio Saezen ‘San Isidro Gudalupeko zelaian’ izenpeko ikerketa historiko “sakona” ezagutzera gonbidatu ditu hondarribiarrak.
“Egun, Hondarribian, San Isidro eguneko jaia ez da lehen zena”, deitoratu du Juan Luis Silanes Kalixa Kultura eta Ingurumen zinegotziak, “nahiz eta hirian festa bizia izaten jarraitzen duen eta jai giro berezia sortzen den”. Ospakizun ezberdina izango da beraz aurtengo Hondarribiko baserritarrentzat.
