Astelehenean berrekingo dio CAFek jarduerari, era mailakatuan
Astelehenean berrekingo dio CAFek jarduerari, era mailakatuan. Akordioa egin dute langileen batzordeak eta zuzendaritzak.
Irunen CAFek duen lantegia. Irungo eta Beasaingo CAFen lantegiak martxan hasiko dira berriz ere astelehenean, baina era mailakatuan. Produkzioari berrekiteko akordioa egin dute langileen batzordeak eta enpresako zuzendaritzak. Martxoaren 16an, langileen ekimenez, gelditu zuen enpresak produkzioa, langileen arabera “langileen eta familien segurtasuna bermatzeko eta beraz, gizartearena oro har”. Osasuna ekonomia jardueraren aurretik jarri zuten.
CAFeko 3.000 langiletik gora, beraz, sei astez egon dira etxeetan: “Zuzendaritza ixtearekin mesfidatia izan zen, ziurrenik iritzi horretan zerikusia izango zuten Adegi eta Cofebask patronalek eta Eusko Jaurlaritzak. Langileek, ordea, osasun agintariek eta gizarteak berak eskatzen zutenari erantzun eredugarria eman diote”.
CAFeko LAB sindikatuaren iritziz (haiek bidali dute oharra HITZAra), segurtasun gaietan arreta berezia jarri behar da, eta langileen batzordearen eta zuzendaritzaren arteko akordioan islatuta dago hori.
Hala, lanean hasteko akordioaren testuan jasota dago telelana bultzatzea; galdutako ekoizpen egunetatik 13 berreskuratzea eta beste hiruak ordaindutako lizentzia gisa ordaintzea (kasu batzuetan aparteko orduen poltsatik deskontatuko dira); gutxienez behin-behineko 100 langile kontratatzea; eta enpresako goi kargudunek eta administrazio kontseiluko kideek euren soldatak %5ean murriztea.
Horrez gain, segurtasun protokoloa adostu dute bi aldeek Beasainen eta Irunen. Horren ardatzak, honakoak: era mailakatuan hastea langileak beharrean, ordu desorekak langileek beregain hartuz, lan osasunari buruzko online prestakuntza bat eginez; prebentzio eta higiene neurri zorrotzak ziurtatzea; balizko kutsaduretarako edo kontaktuetarako protokoloa sortu dute; jantokia itxita egongo da; telelana mantebduko da eta ez da aurrez aurreko bilerarik egingo; zaurgarriak izan daitezkeen 100 langile identifikatu dira, eta haiekin neurri bereziak hartuko dira.
LABek adierazi du zorroztasunez egingo dutela adostutako neurrien jarraipena.
