Gaztetxearen aurkako bigarren auzi judiziala ireki dutela salatu dute
Elizak zabaldu du Egiluz jauregia berreskuratzeko prozedura. Kaleratze arriskuan daudela agerian utzi dute eta horren kontrako mobilizazioak iragarri dituzte.
Gazteak lehenengo prozedura judizialaren harira epaitegiaren atarian egindako elkarretaratzean. 
Hamarkada baten ondoren, iragan apirilean ireki zituen ateak Egiluz jauregiak berriz ere. Biltegi bezala erabiltzen zuen elizak eraikina, eta zaborrez beteta aurkitu zuten gazteek lehen aldiz barrura sartu zirenean. Hainbat auzolanen ondoren ordea, eraikina atondu eta bizi berri bat eman zioten Hondarribiko Gazte Asanbladako (HGA) kideek, eta laguntzera zein sostengua adieraztera gerturatu ziren hamarnaka herritarrek ere.
Lehen prozesu judizial bat jasan zuten orduan gazteek, eta kargurik gabe absolbitu zituzten azkenean. Oraingoan, ordea, elizak zabaldu du eraikina berreskuratzeko auzi prozedura: «Orain dela aste pare bat bigarren prozesu judizial bat martxan jarri dela adierazi digute gutun baten bidez».
«Zikinkeria» besterik pilatuko ez du eraikinak elizaren eskuetara itzuliz gero, gazteek uste dutenez. «Egindako lan guztiarekin, konpondu, garbitu zaindu eta erabilgarri utzi genuen. Gaztetxe bihurtu genuen». Ildo horretan, harreman osasuntsuen eraikuntzan, lanketa politikoan, auzoarekiko lotura eta errespetuan, eta beste hainbat printzipiotan oinarritutako espazioa dela argudiatu dute gazteek.
Kaleratze arriskua dela-eta babesa adieraztera deitu dituzte herritarrak. Izan ere, datozen asteotan mobilizazioak iragarri dituzte eta horietan parte hartzera deitu dituzte hondarribiarrak.
