"Elkarrekiko errespetua" gaztetxearen eta udalaren artean
Gazteek prentsaurrekoa eskaini dute maiatzaren 3an Txomin Sagarzazu alkatearekin izandako bileraren balorazioa egiteko.
Gaztetxean atondu duten liburutegian eman zuten prentsaurrekoa Txomin Sagarzazu alkatearekin izandako bileraren balorazioa egiteko prentsaurrekoa eskaini zuen Hondarribiko Gazte Asanbladak ostiral arratsaldean. Egiluz jauregiaren okupazioaz hitz egiteko bilera eskatu zioten gazteek alkateari, eta Sagarzazuk maiatzaren 3a hartu zituen udaletxean.
Gazteen arabera, “elkarrekiko errespetua” eskatu zien alkateak bileran zehar: “Gure eskubide osoa omen dugu, haien esanetan, gure kabuz proiektu hau aurrera eramateko. Espero dugu hitz hauek zintzoak izatea, jakin baitakigu udalak zer esaterik eta egiterik duela, eta haren erantzukizunak uneoro edukiko dugu kontuan”.
Hala, udalarekiko errespetua adierazi zuen gazte asanbladak, beti ere gaztetxea autogestiotik kudeatuko dutela argi utzita: “Gune autogestionatua da hau eta horrela jarraituko du izaten, ez dugu inongo loturarik eduki nahi instituzioekin”. Halaber, okupazioak erakundeen hutsune bat betetzera datorrela erantsi zuten: “Udalak adierazi digu gazteon kezkei kasu egiteko prest dagoela, baina urteak daramatzagu arazo honekin. Hala balitz, ez ginateke puntu honetara iritsiko”.
Eliza da Egiluz jauregiaren jabea, eta elizarekin ere hitz egiteko prest daudela berretsi zuten gazteek: “Sartu ginenetik elkarrizketara irekiak egon gara”. Baina eraikinaren jabearen jarrera salatu dute, “urteetan jauregia zabortegi moduan” erabili duelakoan. Garbitu eta gero, egoera onean dagoela baieztatu dute, eta kritiko azaldu dira jabeak egiturarekin kezkatuta dagoela azaldu duelako: “Bat-batean badirudi eraikinaren egoerarekin kezkatzen direla, baina gu izan gara kezkatu garen lehenak, eta ondo dagoela baieztatu dezakegu. Edozeinek konprobatu dezake, gaztetxeak ateak irekiak dituelako”.
Ateak irekita uzteko eta Egiluz jauregiari bizitza ematen jarraitzeko konpromisoa adierazi zuen Hondarribiko Gazte Asanbladak joan den ostiralean eskainitako prentsaurrekoan: “Argi dugu Hondarribiak gaztetxe bat behar duela, eta behar horren alde dena emateko prest gaude. Ez gara hemendik mugituko”. Bukatzeko, astebururo antolatzen ari diren eta hemendik aurrera antolatuko dituzten ekitaldietan parte hartzeko gonbita luzatu zieten gazteek hondarribiar guztiei.
