Zenbait proiektu izan dituzte hizpide Arma Plaza fundazioaren lehen patronatuan
«Hasierako bideari» jarraipena eman nahi diotela aipatu du Sagarzazuk; baita epe hurbil eta ertainera begirako bidea jorratzeko «fundazioaren gaineko hausnarketarekin jarraitu ere».
‘Mariñel’ ontzia eraberritzeko lanen esleipena hizpide izan dute.
Agintaldi berria hasi zenetik, Arma Plaza fundazioaren lehen patronatua egin dutela ordezkari politikoek jakitera eman du gaur Txomin Sagarzazu Hondarribiko alkateak. Patronoen kargu uztea eta horien izendapena egin dute udal talde ezberdinetako ordezkariek. Agintaldi berri honetan «hasierako bideari» berriro heldu nahi diotela aipatu du alkateak oharrean. Fundazioaren gaineko hausnarketaren alde ere agertu da, epe hurbil eta ertainera begira fundazioaren ibilbidea zehazteko xedearekin.
Hainbat proiektu izan dituzte hizpide patronoek bileran, hala nola: Mariñel barkuaren eraberritze lanen esleipena, Enrike Lekuona. Itsasoa, ondarea eta euskara ikerketa beka eta Ezagutu zure herria zikloa. Horrez gain, datorren Durangoko Azokan zer nolako presentzia izango duen Arma Plaza fundazioak aztergai eduki zuten ordezkariek.
Azkenik, 2019ko udaran egindako jardueren balorazioa eta 2020ko aurrekontuaren eta proiektuen zirriborroaren azterketa ere egin zuten bileran.
