Tren geltoki berrian animalientzako itxaron gune bat sortzea eskatu du Equo Berdeak Bidasoak
Dagoeneko sinadura bilketa batekin hasi direla jakinarazi dute taldetik, eskualdeko zenbait puntutan eta 'Change.org' plataformaren bitartez.
Argazkia: Equo Berdeak Gipuzkoa. Equo Berdeak Bidasoa taldeak babes sinadura bilketa batekin hasi berri dela jakinarazi du. Irungo tren geltoki berrian etxeko animalientzako itxaron gune bat jartzea eskatzen ari dira hiriko zenbait puntutan, baita ere Change.org plataformaren bitartez.
“Garraio publikoaren erabiltzaileen artean animalia daramatenak gero eta gehiago direla ikusirik, egokitzat jotzen dugu horrelako zerbitzu bat irekitzea”, diote formazio ekologistatik. Gune berria “toki espezifiko” bat izango litzatekeela azaldu dute, gainerako itxaron guneetatik bereizia, “animaliei gune eroso bat ahalbidetzeko”. Gainera, bidaiari asko komunetan edo trenean bertan animaliekin egotearekin deseroso sentitzen direla dio, eta hala, bizikidetza arazoak konpontzeko eta trenbidearen erabilera “areagotzeko” lagungarri izan daitekeela egitasmoa.
Sinadura bilketa egin ostean, udalari eskaera helaraziko diote, gobernuko kideek ADIFi pasa diezaieten. “Gure ustez horrelako ekimen bat mesedegarri litzateke hiriaren irudi barne-hartzaile, moderno eta sentsibilizatua emateko”. Bidasoko herritarrak animalien zaintzarekin “eredugarriak” direla nabarmendu dute taldetik, eta ziur daude eskaera begi onez hartuko dutela.
