Hauteskunde programan zazpi konpromiso bildu ditu PSE-EE taldeak
'Baietz Irun' leloa aukeratu dute datozen bi asteotarako. Kanpaina "deskalifikaziorik, gerra zikinik eta irainik gabe" egingo dutela nabarmendu du Santano alkateak.
Atzo herritarrekin partekatu zuen programa Santano alkateak, Irungo Herriko Etxean. Irungo alkate eta PSE-EE taldeko alkategai Jose Antonio Santanok udal hauteskundeetarako osatu duten programa aurkeztu berri du. ‘Baietz Irun’ leloa aukeratu dute datozen bi asteotako kanpainarako. “Leloarekin argi utzi dugu Irun dela protagonista nagusia, eta hori da garrantzitsuena. Askotan esplikatu dugu ez dugula inoren aurkako kanpainarik egingo. Hiria hobetzeko ideiak ditugu, hori da bizilagunei helarazi nahi dieguna. Deskalifikaziorik, gerra zikinik eta irainik gabe”, adierazi du alkateak.
Programa osatzeko, hiriko 50 elkarte eta eragile baino gehiagorekin bildu direla nabarmendu du alkategaiak. Datozen egunotan banatuko dute programa, hiriko auzo guztietan egunero egingo dituzten ekitaldietan. Orotara, talde sozialistak zazpi konpromiso hartu ditu: “pertsonentzako proiektuekin, elkartasunarekin, bizi kalitatearekin, aukera gehiago eta hobeagoekin, ardura eta eraginkortasunarekin, etorkizuneko ilusioekin eta auzo gero eta hobeagoekin”. Zazpi horietan 25 proiektu zehaztu dituztela adierazi du Santanok, “garrantzitsuak eta errealistak” guztiak. Datozen egunotan programaren xehetasun guztien berri emango dute.
PSE-EE taldearen programa edota kanpainaren egunerokoa jarraitu nahi duten herritarrek aukera izango dute WhatsApp zerbitzuaren bitartez. 676 17 47 08 telefono zenbakian eman daiteke izena, ‘alta’ hitza idatziz. Programa osoa, alkatearen webgune pertsonalean eskuragarri izango dela jakinarazi dute.
