Kataluniako buruzagi independentisten aurkako epaiketa salatuko dute Irunen
Irungo mugimenduak ere bat egin du Gure Esku Dagoren deialdiarekin, eta hala, elkarretaratzea antolatu dute astearterako, Zabaltza plazan (19:00etan).
Datorren asteartean (hilak 12) Kataluniako politikari eta gizarte mugimenduetako buruzagi independentisten aurkako epaiketa hasiko dute Madrilen. Epaituko dituztenei, eta oro har kataluniar guztiei babesa emateko mobilizazioak deitu ditu Gure Esku Dago mugimenduak Euskal Herriko zenbait herritan.
Irungo mugimenduak ere bat egin du deialdiarekin, eta hala, elkarretaratzea antolatu dute astearterako, Zabaltza plazan (19:00etan). ‘Konponbidea. Democracia. Llibertat’ lelopean bilduko dira irundarrak. “Ez da soilik katalanen aurkako epaiketa. Denon eskubideak epaitzen ari dira”, adierazi dute mugimendutik.
Irungo mobilizazioaz gain, Gure Esku Dagok hilaren 17rako Donostian antolatu duen manifestazio nazionalera joateko deialdia luzatu dute mugimendutik. 12:00etan abiatuko dira Groseko Katalunia plazatik. Irundar guztiak mobilizatzera animatu dituzte.