'Egunero izan beharko luke martxoak 8' leloarekin bat egin dute alarde tradizionalen sustatzaileek
Irungo eta Hondarribiko alarde baztertzaileak sustatzen dituzten zortzi talde eta erakundek ohar bateratua egin dute Emakumeen Nazioarteko Egunaren harira.
“Berdintasunaren alde lan egiteko dugun konpromisoa” berresteko, ohar bateratua landu dute Irungo nahiz Hondarribiko alarde tradizional eta baztertzaileak —ez dituzte emakumeak soldadu bezala desfilatzen onartzen— sustatzen dituzten erakundeek. Emakumeen Nazioarteko Egunaren testuinguruan kaleratu dute agiria. Egunero izan beharko luke martxoak 8 leloarekin Irungo Zabaltza plazan asteazkenean egingo den elkarretaratzearekin bat egiteko eskatu diete herritarrei, “mezu hau erreferentzia gisa hartzen dugu urte osoan lan egiteak duen garrantzia nabarmentzeko, denon artean berdintasunezko gizarte bat lortzeko, eta gaixotasun horrekin amaitzeko”. 19:00etan hasiko da mobilizazioa. Horrez gain, martxoaren 8aren harira antolatutako bestelako ekitaldietan ere parte hartzera deitu dituzte herritarrak.
Oharra zortzi erakunderen artean landu eta adostu dute. San Martzial Alardearen Buruzagien Batzordea, San Martzial Alardearen Batzordea, Emakume Irundarrak, GordeZAN-Anakako Emakumeak Kultur Elkartea, Pagoki Emakume Elkartea, Mugarriluze Alardearen Aldeko Emakume Elkartea, Alarde Fundazioa eta Hondarribiko Emakumeak dira talde eta erakunde horiek.
Horiek esan dutenez, San Martzial Alardea eta Hondarribiko Alardea “erabat legezkoak dira, Auzitegi Gorenaren epaiek adierazi dute hori. Ez da inolako diskriminaziorik gertatzen genero edo desberdintasun arrazoiak direla eta”. Aldi berean, “alardeei babesa ematen emakume guztiek ekiteko eta iritzia emateko askatasuna” dutela adierazi dute oharra landu dutenek: “Askatasun hori da berdinak bilakatzen gaituena, eta ez dugu ahalbidetuko inork zalantzan jartzea, ezta interes faltsuetarako erabiltzea ere”.
Irunen bi alarde daude. Horietako batek, publikoak, bermatzen du emakumeek soldadu bezala desfilatzeko hautua. Hondarribian Jaizkibel konpainiak bermatzen du hori.