Atzo X. Euskal Herriko Pintxo Txapelketako finalerdietan lehiatu zen Sardara, baina ez da finalerako sailkatu.
Sardarako sukaldariak, pintxoa prestatzen finalerdietan
Aurten ez da Hondarribiko ordezkaririk izango Euskal Herriko Pintxo Txapelketako finalean. Herriko sei tabernek eman zuten izena lehiaketan, eta bakarrak lortu zuen finalerdietako txartela, Gorka Soutoren Sardarak. Atzo arratsaldean lehiatu zen
bigarren fasean Sardara, baina ezin izan zuen aurerra egin. Hortaz, hondarribiarrik ez da egongo finalean, 2006tik aurrenekoz.
Urte hartan egin zen lehen aldiz Euskal Herriko Pintxo Txapelketa, eta lehen edizio hori izan da orain arte, finalisten artean hondarribiarrik izan ez dituen bakarra. Bitxikeria bezala, hamar onenen artean Gasteizko Hondarribia taberna sailkatu zen 2006an. Herriko ordezkaririk ez, beraz, baina Hondarribia izena bai finalisten artean. Hortik aurrera, beti izan da hondarribiarren bat pintxo txapelketa nagusiko azken fasean —2008koan 20 izan ziren finalistak, hamarren ordez, eta Hondarribiko hiru horien artean—.
Gran Sol izan da txapelketako azken egunean gehien lehiatu izan den herriko establezimendua; bitan txapela lortzeaz gain (2010 eta 2013), beste hainbestetan bigarren izan da (2007 eta iaz), eta beste lau bider sailkatu da finalisten artean (2008, 2009, 2011 eta 2012). Txapelketako finalean Hondarribiko ordezkariren bat izan den guztietan, han izan da San Pedro kaleko taberna.
Hori ez ezik, finalista bezala errepikatu duen Hondarribiko taberna bakarra izan da Bixente Muñozena. Beste sei ordezkarik lortu dute meritu hori, bakoitzak behin: Olatu (2008), Ardoka (2008), Batzokia (2009), Goxodenda (2011), Kai Zaharra (2012) eta Sardara (iaz). Aurten finalerdietan izan da Sardara, baina ezingo du gaurko finalean lehiatu.
Gaur goizean egingo dute finala Itsas Etxean, 09:30etik aurrera.
Hamar finalistak
- Sagarra (Ermua, Bizkaia)
- Le impertinent (Biarritz, Lapurdi)
- Kiosko (Bilbao)
- Nuevo Hostaff (Tafalla, Nafarroa)
- Aitzgorri (Donostia)
- Alex Mugika (Iruñea)
- Zallo (Gernika, Bizkaia)
- Haritza (Mungia, Bizkaia)
- Abaco (Huarte, Nafarroa) —iazko txapelduna—
- Zeruko (Donostia)
