Atzo egun luzea izan zuten hondarribiarrek. Gaur ekitaldi irmoz beteriko eguna da, baina izango da dibertitzeko aukerarik ere.
Graffiti lehiaketek egoitza paregabea aurkitu dute Kasino Zaharrean
Egun luzea izan zen atzo hondarribiarrentzat. Haurrek abiatu zuten festa, udaletxeko balkoitik txupina jaurtiz eta Kale Nagusia globo eta konfettiz margotuz. Zezen puzgarrien aurrean korrika egiteko aukera izan zuten gero.
Arratsaldean ere haur eta gaztetxoena izan zen egitaraua, baina ez bakarrik eurena: Klink elkarteak antolatutako margo lehiaketa arrakastatsua, lehen aldiz Kasino Zaharreko lorategietara mugitu ziren graffiti lehaketak, buruhandi eta erraldoien lehen irteera zalapartatsua, eta abar.
Errepresialiatuen aldeko brindisa, txosnetan
Bitartean herriko kaleak gaztetxo, gazte eta ez hain gazte diren koadrilez betetzen joan ziren, afarirako prest. Benta gunean ere izan zen zer egin eta zer entzun. Presoen eta iheslarien aldeko brindisa egin zuten afaldu aurretik, eta afalostean Los Chikos del Maiz eta Tea Party DJen kontzertuak izan ziren.
Gaur, hasiera ofiziala
Jaiak atzo hasi baziren, gaur berriro hasiko dira, ofizialki. Haurren danborradarekin hasiko da eguna. Danborradak bere ibilbidea egiten duen bitartean, hasiera ofiziala emango zaie jaiei.
Damaso Urangak botako du suziria paradoretik, hiriko intsignia jaso baino minutu batzuk lehenago.
Ekitaldi irmoz beteriko eguna da hilaren 7a. Besteak beste, parrokian nahiz Guadalupen Salbea entzuteko aukera izango da, eta udal ordezkariek aurreskua dantzatuko dute.
Erakusketak bisitatzeko egun aproposa izan daiteke gaur ere. Arma Plazan
kartel eta
argazki lehiaketetara aurkeztutako lanak daude, eta Gipuzkoa plazan, Javier Sagarzazuren Arkupe aretoan,
herriko bederatzi margolarien lanak.
Hilaren 7ko egitaraua
- 11:15. Haurren Danborrada Mendelu auzotik abiatuko da eta Amute, Kosta eta Santa Engrazia igaro ondoren, Hiriguneko kaleetan amaituko du bere ibilaldia.
- 12:00. Suziri eta kanpai hotsez hiriko jaiei hasiera ofiziala emango zaie. Bitartean, txistulariak kalean ibiliko dira 1638ko setioko Titi-Biliti doinua joz.
- 12:15. Erraldoiak eta buruhandiak, Haurren Danborradarekin batera, Arma Plazatik abiatu eta kalez kale ibiliko dira.
- 12:30. Damaso Uranga Odriozola jaunari Hiriko Urrezko Intsignia jarriko diote.
- 18:30. Hondarribia Hiria Musika Banda kalez kale ibiliko da Titi-Biliti joaz.
- 20:00. Te Deum eta Salbea Jasokunde eta Sagarrondoko Ama Birjinaren elizan. Parrokiako abesbatzak Eslavaren Salbea abestuko du. Bitartean, ohiko deskargak egingo dira. Elizkizuna amaitzean udal kideek Aurreskua dantzatuko dute Arma Plazan, hondarribiar guztien omenez. Ondoren, Danborrada Kalejira hirian barrena.
- 20:00. Guadalupeko elizan Salbe herrikoia kantatuko da. Ondoren, ohiko deskargak egingo dira.
