Udalak alardearen gatazkari ez ikusiarena egiteari utzi behar diola uste du koalizioak, eta motore izan behar duela elkarrizketa eta adostasun prozesu anitz eta parte hartzaile batean.
Gaurko agerraldian, EH Bilduko kideak
Hondarribiko EH Bilduk uste du alardearen “gatazka” gainditzeko udalak antolatu behar duela, lehen moduan, alardea. Hori ondorioa. Baina horren aurretik zer egin badagoela uste du koalizioak, betiere elkarrizketaren eta adostasunaren bidetik: “Alardearen gatazka gaindituko bada, elkarrizketa prozesua abiatzea beharrezkoa dela iruditzen zaigu, udaletatik hasita, legebiltzarreraino”. Eta bide hori, erakundeez gain, alderdi eta gizarte eragile guztiek egin behar dutela uste du Lore Erriondo EH Bilduren zinegotziak, “bakoitza beretik, inor ukatu gabe, eta errespetua lagun”. Koalizioak Hondarribiko Alardearen gaineko agerraldia egin du gaur Donostian, bertan alderdiaren udal hautetsi nahiz kideak zeudela.
Udalaren erantzukizunaz gogoeta egin du gaur Lore Erriondok, uste baitu herritarrengandik hurbilen dagoen erakundea izanda, jaiak antolatzeko ardura duelako, eta “adosteko tokia” delako, bertatik atera behar dela alardearen gaia konpontzeko iniziatiba, “aferan ez ikusiarena egiteari utzi eta luzatu gabe, beharrezkoa dugu lantalde bat sortzea udalaren ordezkaritzaren ardurapean. Hondarribiarrok, behingoz, iritzi diskriminatzailerik gabe bizitzeko eskubidea dugulako”. Elkarrizketa prozesu bat planteatu du EH Bilduk epe ertainera, “seguru gaude alardeen gatazka gaindi daitekeela. Urrats batzuk emanak ditugu dagoeneko”.
Epe laburrera, aurtengo alardeari begira ere jarri dira Hondarribiko EH Bildukoak, eta begirunea eskatu du alarde parekidearentzat, “ez irainik, ez bortxarik ezta baztertzeko ekimenik ere”. Espazio publikoak berdintasunean erabiltzeko eskubidea ere defendatu du koalizioak.
Euskal Herriko antzinako ondarearen defentsa bere egiten duela esan du Lore Erriondok, eta kontziente dira herriko jaietan tradizioak eta berritasunek talka egiten dutela, baina bizikidetzan oinarritutako jai ereduen alde egiten du, Euskal Herriko “historia, hizkuntza, kultura eta antzinako ondarea” defendatuz. Alta, jai parte hartzaileak nahi ditu koalizioak “ezin onar dezakegu emakumeak baztertzen dituen ekitaldirik, ospakizunik, jairik. EH Bilduk ezin onar dezake emakumezkoa baztertzen duen alarderik”. Eta berdintasuna babestea eta defendatzea erakundeen ardura dela esan du Erriondok.
