Irungo EH Bilduk esan duenez, "gehiegi" luzatzen ari da bi alderdi horien arteko negoziazio prozesua, "susmoa dugu legeak ezarritako epeak agortuko dituztela".
Irungo EH Bilduko kideak, hauteskunde kanpainako ekitaldi batean
Irungo EH Bilduk kezka adierazi du Irunen PSE eta EAJ aurrera eramaten ari diren negoziazio prozesuarekin, udalaren kargu, liberazio eta soldata nahiz asignazio banaketarako izan daitekeena koalizioko kideen ustez. Negoziazio horiek “luze, oso luze” doazela iritzi du. Horrek udalaren zereginean “geldiunea” eragiten duela uste du, eta akordioaren bilatze horren gaineko “informazio falta” dagoela esan.
Izan ere, Irungo EH Bilduk esan du beste herri edo erakunde batzuetan EAJren eta PSEren arteko negoziazioen edukien berri ematen ari zaizkiela herritarrei, “batez ere eduki programatikoen berri”, eta Irunen ez: “Isiltasuna da nabaria den bakarra”. Bi alderdi horien artean hasitako prozesuan ezadostasunak dauden edo ez, ez daki EH Bilduk, baina bai exijitu du arin har ditzatela bi alderdiek erabakiak: “Udal hauteskundeetatik hilabete eta erdi inguru pasatu da, eta udalbatza osatu zenetik ia hilabete. Irundar hiritarrok egunero pairatzen dugun gardentasun eza salatu nahi dugu”.
EAJ, mahai batetik bestera
Irungo EH Bilduk esan duenez, Euskal Erkidego Autonomoan PSE-EEk eta EAJk egin duten akordioak, Irunen ere bi alderdi horiek elkar ulertzera “behartzen” ditu, eta termino horietan koalizioak ulertzen du bi alderdi horien arteko negoziazioak martxan egotea. Baina alderdi subiranistak adierazi duenez, negoziazio horiek hasi baino lehen, EH Bildu eta Si Se Puede Irunekin batera lan mahai batean zegoen parte hartzen Irungo EAJ hainbat gaiz gogoeta egiteko, “baina gai horiek mahaiaren gainean zeudela, EAJk mahaia utzi eta PSErekin negoziatzen hasi zen”.
Gai horiek ziren, besteak beste, zinegotzi eta alderdien asignazioak, eta liberatuen kopuruak eta soldatak (politikoenak eta bestelakoenak). Eta mahai horretan EH Bilduk azaldutako proposamenean jasota dagoenez, horien kopurua eta asignazioak “proportzionalagoak” izatea bilatzen zen, “aurreko soldata taula goitik behera aldatuz”. Taula horren arabera, gehien kobratuko duen liberatuak ezingo du gutxien kobratzen duenaren bikoitza kobratu; hortaz, alkatearen kasuan (udalean gehien kobratzen duen liberatua da), orain artean izan duen urteko 59.500 euroko soldata 45.000n geldituko litzateke. Hau da, soldaten jaitsiera, alkatearen kasuan bezala, orokorra planteatzen du EH Bilduk, eta alkatearen kabineteko lanpostu bat kentzea.
Proposamen horrekin Si Se Puede Irun ados zegoela esan du EH Bilduk; EAJ, mahai horretan izan zen bitartean, “planteamendu horretatik nahiko urrun” ikusi zuen koalizioak, “soldaten jaitsieraren alorrean batik bat”.
Proposamen horrekin aurrrera jarraituko duela adierazi du Oinatz Mitxelena buru duen alderdiak.
