Jai eguna dute larunbatekoa Elatzetan, Irungo Katea auzoko ikastetxean. HHko eraikin berria inauguratzeaz gain (irailetik zegoen martxan), ikastetxearen jaia egingo dute.
Eraikin berriaren patioetako batean, horma apainduta
Irungo Katea auzokoElatzeta ikastetxearen egin handia izango da larunbatekoa, bi arrazoigatik. Lehena, garrantzitsuena Haur Hezkuntzako (HH) eraikin berria inauguratuko dutela da. Bigarrena, Elatzeta Eguna egingo dutela, urteroko jaia.
Berez, irailetik zegoen martxan Elatzetako eraikin berria. 184 ikaslerentzat edukiera du, horrela banatuta: bi urtekoen bi talde, eta hiru, lau eta bost urtekoen bina talde. Horrez gain, psikomotrizitate gela, bideo gela handia, laguntza gelak eta jangela ere badaude. Bi patio ere bai: bat bi urtekoentzat, bestea 3-5 adin tartekoentzat (zati bat estalia du). Gainera, patioaren ondoan, belardia badago: bertan baratzeak egiteko baliatu dute eremu hori, eta txandaka, ikasleak baratzea lantzera joaten dira. Eraikin osoa ikusteko aukera larunbatean egongo da.
Hori eraikina. Baina hemen, larunbateko jaiari buruzko xehetasunak, Elatzeta Egunekoak:
- Goizean zehar, hainbat jolas eta erakustaldi, eskolaz kanpoko ekintzetako taldeek urtean zehar ikasitakoak: euskal dantzak, gimnastika erritimikoa, xakea, judoa…
- 11:30ean, inaugurazio ekitaldia ikastetxeko, Jaurlaritza Hezkuntza Saileko, eta udaleko ordezkariekin. Soka moztu beharrean, katea moztuko dute: Foruak kendu arte auzoan katea egoten zen, eta hori oroituko dute kate-mozketaren bidez.
- 12:00etan, 6. Mailako ikasleen agurra, eta ikuskizuna emango dute.
