Irungo haurrek ikasi dute zer den elikadura iraunkorra, eta praktikan jartzen hasi dira. Alkateari argibideak eman dizkiote.
Irungo ikasleak, alkatearekin, azalpenak eman ondoren
Eskola Agenda 21en barruan, elikadura iraunkorraz gogoeta egin dute Irungo ikastetxeetako haurrek. Zer egin duten, eta nola, atzo aurkeztu zuten ikasleek alkatearen aurrean. Orotara, hiriko hamar ikastetxek parte hartu dute egitasmoan, 5.000 ikasle lanean jarriz.
Irunen eta euren ikastetxeetan elikaduraren gaia aztertu ondoren, antzemandako gabeziei aurre egiteko neurriak ezartzen hasi dira ikasleak ikasturtean zehar. Izan ere, Eskola Agenda 21 egitasmoaren abiapuntu da hiri, herri eta norbanako iraunkorren alde egitea, tartean, elikadura landuz —beste urteetan beste hainbat gai landu dituzte—.
Alkatearen aurrean, egindakoa adierazteaz gain, udalak gaiarekiko konpromisoa har dezala eskatu zuten hiriko hamar ikastetxeetako ordezkariek. Honakoak dira Eskola Agenda 21en barruan elikaduraren gaia landu duten eskolak: Elatzeta, Dunboa LH, Eguzkitza BH, Hirubide, Irungo La Salle, Pio Baroja Institutua, San Vicente de Paul, Toki Alai BH, Txingudi LH eta Txingudi BH.