Irungo gazteak, bertsolari trebeak

Irungo ikastetxeetako gazteek Gu Ere Bertsotan egitasmoan parte hartu dute ikasturtean zehar. Amaian sasoi bukaerako saioak egin dituzte.

Urko Etxebeste

Irun

2015/06/01

Hilaren 26ko saioaren une bat

Gu Ere Bertsotan 2015 ekitaldiaren barruan 400 gazte irundarrek parte hartu dute, hainbat ikastetxetakoak. Egitasmoaren ikasturte bukaerako festa bi egunetan egin zuten, hilaren 19an eta 26an, Amaia KZn egindako saioetan. Bertan azaldu zuten bertsolari gazteek ikasturtean zehar ikasitakoa, noski, bertsotan. Bertsolaritzaren hainbat baliabide ikasi dituzte Irungo ikasleek, sormena, ahozkotasuna, jendaurrean egoteko estrategiak, eta bestelakoak landuz. Eta hori hainbat erara landu dute, tartean, idatziz eta taldeka: hilaren 26ko jaialdian Amaian abestu zituzten idatzitako bertso horiek, bertsoen gaiarekin harremana zuten mozorroek lagunduta (irudian). Lehiaketa modukoa izan zen, Irunabar Irungo Bertsoaren Bilgunearen, Gipuzkoako Bertsozale Elkartearen eta ikastetxeen laguntzaren bitartez antolatutakoa. Izan ere, Gu Ere Bertsolariren atzean Gipuzkoako Bertsozale Elkartearen eta ikastetxeen arteko elkarlana dago. Eta Irunen hori aurrera eramaten ikastetxez ikastetxe Ander Lizarralde eta Alaia Martin bertsolari oiartzuarrak aritu dira. Udala pozik dago bertsolaritza sustatzeko jarduerak eman duenarekin. Fernando San Martin Euskara arloko jarduneko ordezkariak esan duenez, ederra izan da ikasleek ikasgelan ikastitakoa oholtzara eramatea, beste ikasleen aurrean ikuskizuna emanaz. Irungo honako ikastetxeek parte hartu dute egitasmoan: Belaskoenea, Eguzkitza, El Pilar, Elatzeta eta Dunboa. 5. eta 6. mailako ikasleek parte hartu dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.