Bigarren taldeak "agur" esan dio Preferente Mailari
Atzo jaitsiera kanporaketako itzuliko partida jokatu zuen Legazpin, Ilintxaren kontra eta 6-0 galdu zuten hondarribiarrek. Datorren urtean Lehen Erregionalean jokatuko dute, Preferente Maila galduta.
Festa ezin izan da erabatekoa izan eta Hondarribia Futbol Elkarteko bigarren taldeak Preferente maila galdu du. Joan den asteburuan lehen taldeak lortutakoa ezin izan du bigarrenak errepikatu, eta hurrengo urtean Lehen Erregionalera itzuliko da Hondarribia B. Atzo jaitsiera kanporaketako itzuliko partida jokatu zuen Legazpin, Ilintxaren kontra —joanekoan 1-1 geratu ziren—, eta 6-0 galdu zuten hondarribiarrek.
Preferente Mailan denboraldi irregularra egin du Hondarribia Bk. Liga hasiera oso maldatsua egin zitzaion, Lurraldeko Lehen Mailatik Preferentera jauzi handia dagoelako. Finean, lehen talde askoren aurka jokatu behar izan du aurten Hondarribiko bigarren hamaikakoak eta fisikoki alde handia dagoela ikusi da. Hala, lehen garaipena hamargarren jardunaldian lortu zuten berdeek.
Hortik aurrera emaitza on batzuk lortu izan ditu eta horiei esker bizirik iraun du azken unera arte, baina gol gutxien sartu eta gehien jaso dituen taldea izan da, alde handiagatik gainera. Liga, azken hirugarren bukatu zuen eta horrek aukera eman dio Ilintxaren kontra jaitsiera kanporaketa jokatzeko. Joanekoan, Hondartzan, berdindu egin zuten, baina atzo Legazpin 6-0 irabazi zuten etxekoek.
Datorren urtean Lehen Erregionalean jokatuko du Hondarribia Bk, eta aurten baino erosogo ariko dira. Iaz igoeraren saria jaso zuten, eta denboraldia gogorra egin zaien arren, irakasgai ona izan da jokalarientzat. Gainera, zaleak beti ondoan izan dituzte eta hori ez da aldatuko datorren urteari begira.
Erlazionatutako edukiaHondarribiak ohorezkoa izaten jarraituko du
