Droga trafikoa egotzita, hiru lagun atxilotu dituzte taberna batean
Ertzaintzaren arabera, "doitasun-baskula bat" atzemateaz gain, "egindako miaketetan, agenteek munizio detonatzailez kargatutako errebolberra, film paperean bildutako billeteak eta 180 gramo kokaina" aurkitu zituzten.
Ertzaintzak polizia operazioa egin zuen atzo arratsaldean Irungo taberna batean eta horren ondorioz, hiru lagun atxilo eraman zituen, ustez drogarekin trafikatzeagatik. Ertzaintzak adierazitakoaren arabera, bost lagun drogarekin trafikatzen ari zirela taberna batean esan zieten eta beraz, “bertara joan ziren ertzainek emandako deskribapenarekin bat zetozen hiru gizon aurkitu zituzten tabernaren kanpoaldean”.
Hori horrela, ertzainek miaketei ekin zieten. “Gizonetako bati errebolber bat aurkitu zioten orkatilan ezkutaturik. Munizio detonatzailez kargatuta zegoen”, adierazi dute, “beste batek film paperean bildutako billete sorta bat zuen eta hirugarrenak, kokainaz betetako poltsa bat”. Poltsa horretan 180 gramo kokaina zeudela zehaztu du Ertzaintzak. Baina aipatutakoaz gain, ustez, kokaina zuten bi poltsa gehiago eta doitasun-baskula bat ere aurkitu zituztela esan dute ertzainek.
Ustezko droga trafiko delitua leporatuta, 31, 38 eta 40 urteko gizonak atxilo eraman zituen atzo Ertzaintzak.
