Behobiako bidegorriaren inguruan EAJren eta PSEren udal gobernuaren arteko desadostasunak agerian gelditu dira azken egunotan. Horren harira, Eusko Jaurlaritzak 2015eko aurrekontuetan "Behobiako bidegorrirako 1,5 milioi euro" bideratzea "Irungo proiektuak bultzatzea" dela iritzi dio Iridoyk.
Xabier Iridoy EAJren bozeramailea
Irungo EAJren udal taldeko Xabier Iridoy bozeramaileak Miguel Angel Paez alkateordeak eta Cristina Laborda Obra delegatuak Behobiako bidegorriaren inguruan atzo egindako adierazpenei erantzuna eman zion bart azken orduan medioetara bidalitako oharrean. “Gobernu sozialistaren lotsagabekeriak ez du mugarik”, iritzi zion jeltzaleen bozeramaileak, “gauzak gaizki ateratzen direnean, errudunak etxetik kanpo bilatzea ohikoa izaten da gobernu honetan”, erantsi zuen.
Ildo horretan, Iridoyk aipatu zuen “onartezina” dela “Eusko Jaurlaritzari hirirako proiektuak oztopatu izana leporatzea euskal administrazioak Irunerako aurrekontu-partidak bideratu dituenean, eta zehazki, Behobiako bidegorrirako 1,5 milioi euro aurreikusi dituenean”. Haren arabera, “Irungo proiektuak bultzatzea” da hori.
Hala, 800.000 euroak galdu izana “deitoratu dugu eta jakin nahi izan dugu zer gertatu den eta udal gobernuak zergatik ez duen ezer egin”. Zentzu horretan “gardentasun falta” leporatu dio Iridoyk beste behin PSEren tokiko gobernuari: “Irunerako proiektuak zalaparta handiz saltzeko orduan udal gobernuak ez du inolako eragozpenik, baina zerbait ondo ez doanean eta aurrera ateratzen ez denean, orduan gobernu honen informazioa eta gardentasuna desagertu egiten dira”, kritikatu du.
Hori horrela “duela urtebete gobernu sozialistak bost milioi euroko proiektua saldu zuen publikoki” Espainiako Ingurumen Ministerioaren eta Ura euskal ur agentziaren “bermeak ez zituenean”. Hori dela eta, “otsoaren azala ehizatu baino lehen saldu zuen, eta horrek egoera honetara eraman gaitu”, deitoratu du bozeramaile jeltzaleak.
Bukatzeko, PSEk informazioa plazaratu duela EAJk “egindako salaketaren ondorioz” leporatu dio Iridoyk udal gobernuari: “Urte honetan zehar proiektua birplanteatzen joan dira eta astelehenean, Bozeramaile Batzordean gai horri buruzko informazio guztia helarazi zitzaigun, xehetasun guztiekin. Zergatik ez dugu informazio hori lehenago jaso?”.
Bozeramailearen ustetan “informazioa guk publikoki egindako salaketaren ondorioz iritsi zitzaigun, ez gobernuak oposizioko taldeoi, eta gutxiago hiritarrei, informazioa helarazteko asmorik zuelako. Hori informazioa ezkutatzea eta irundarrei iruzur egitea dela deritzogu. Are gehiago, azken asteotan Behobiako bidegorriaz asko hitz egin denean”.
