Alegazioak aztertuta, aurrera doa HAPOa
Arkitektoak alegazioei emandako erantzunak ontzat eman ditu aholku batzordeak. Bilduk kontra bozkatu du eta PSE-EE eta Amute auzoa abstenitu egin dira. Txostena plenora joango da urtarrilean.
Hirigintza Aholku Batzordeak atzo arratsaldean eginiko bileran, HAPOari egindako alegazioen gainean Francisco de Leon arkitektoak prestaturiko txostena onartu zen, gehiengoz. EAJk, Hamaikabatek, Hondarribia Arraun Elkarteak, Bidasoa Bizirikek eta ACUBIk eman zuten aldeko bozka, Amute-Kosta Auzo Elkartea eta PSE-EE abstenitu egin ziren, eta Bilduk kontra bozkatu zuen.
Alegazioak aztertu eta gero onartutako testua plenora bideratuko da, HAPOaren hasierako onarpenerako. Hori urtarrileko lehen hamabostaldian izatea espero dute. “Gero beste administrazioek agiriari buruzko informazioa emango dute, eta azkenik Hiri Antolamendurako Plan Orokorra behin betiko onartzea geratzen da” erantsi du alkateak.
Aholku Batzordeko araudiak zehaztutakoaren arabera, bileretan ordezkaritza politikoa eta herriko erakundeetakoa izan da. Politikoen aldetik, udal gobernuko hainbat kide (alkatea buru) eta oposizioko ordezkariak izan dira. Eta herriko eragileen artean, Amute-Kosta Bizilagun Elkartea, Hondarribia Kirol Elkartea, Higer Merkatari Elkartea, Ostalarien Elkartea, Behemendi, Arrantzaleen Kofradia, ACUBI eta Bidasoa Bizirik, besteak beste.
