Iñigo Cervantes 6. zerrendaburu izango da Espainiako Txapelketan
Hondarribiarra Bartzelonan bizi da eta Real Club de Tenis Barcelonan jokatzen du, Rafa Nadal, Roberto Bautista, Feliciano Lopez eta munduko zerrendan goiko postuetan dauden beste hainbatekin. Abenduaren 16an hasiko da banakako Espainiako Tenis Txapelketa, eta San Joan Despin (Bartzelona) jokatuko dute.
Hilaren 16tik aurrera Espainiako Tenis Txapelketan parte hartuko du Iñigo Cervantes tenislari hondarribiarrak. San Joan Despin (Bartzelona, Katalunia) jokatuko dute txapelketa, bere etxetik oso gertu.
Hogeita lau tenislarik jokatuko dute Espainiako txapelketa; dagoeneko 21 ezagunak dira —horien artean dago hondarribiarra——, eta gainontzeko hirurak aurretiko fasetik aterako dira.
Espainiako Tenis Federazioaren rankingaren arabera, hondarribiarra seigarren zerrendaburu izango da txapelketan. Cervantes 23. postuan dago rankinean, eta ekainetik sei postu irabazi ditu. Albert Ramos da San Joan Despin lehiatuko direnen artean hoberen kokatuta dagoen kirolaria, 12. iraileko zerrendan.
Orain bi urte lesioekin izandako arazoak ahaztuta, emaitza politak ari da lortzen. Duela gutxi, taldekako Espainiako txapelketa irabazi zuen hondarribiarrak, Real Club de Tenis Barcelonarekin. Azken kanporaketetan taldearentzat puntu gehien lortu zituen tenislaria izan zen Cervantes.
