Hondakinak murrizteko tresna ere badela erakutsi du Merka2dasoak

Asier Perez-Karkamo

2014/12/09

Merka2dasoako azoka bat

Txingudiko Zerbitzuak erakunde publikoak (Txinzer), bigarren eskuko azoken urteko balantzea egin du, eta “herritarrak sentsibilizatzeko eta kontzientziatzeko” duen helburua betetzeaz gain, “zabortegira bidaltzen diren hondakinen bolumena murrizteko” tresna egokia direla baieztatu du Leire Zubitur erakundeko gerente berriak. Aurten hiru merkatu egin dituzte, bi Irunen eta beste bat Hondarribian, eta horietan lau tonatik gora pasatu ziren esku batetik bestera: “Guztira 5.754 objektu saldu ziren, 4.341 kilogramoko pisuarekin. Merkatu bakoitzean parte hartu zuten 15 posturi egindako inkesten bidez jaso dira datuak. Horiei esker, kuantifikatu ahal izan da jabe berrien eskuetara pasa diren objektuen bolumena, zabortegi edo garbigune batean bukatu gabe, eta eskualdeko biztanleek ere aurreztu egin dute haien kudeaketaren eta tratamenduren kostua”. Sei urte bete ditu aurten Merka2dasoa ekimenak eta Zubiturren esanetan, urtetik urtera azoka bera berritzeko saiakera egin dute. “Sei urte hauetan ahalegin bat egin da merkatu horiek duintzeko, itxura erakargarria izan dezaten, eta eskualdeko ahalik eta pertsona edo familia gehienek parte hartu ahal izateko. Horregatik, edizio bakoitzean lehentasuna ematen zaie inoiz postu bat izan ez dutenei eta, arrazoi horregatik ere, jadanik ugari dira esperientzia hori bizi izan duten familia bidasotarrak”. 2015ean ere hiru edizio egitea aurreikusten du Txinzerrek. “Oraindik goiz da datorren urteko datak zein izango diren jakiteko, baina gure asmoa da horiekin aurrera jarraitzea”, erantsi du Zubiturrek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.