Paez EH Bilduri: "Udalak ez du beste erakunderik behar auzotarrengana jotzeko"
EH Bilduren udal taldeak egindako adierazpenei erantzun die Miguel Angel Paez Ekonomiaren Sustapenerako eta Ogasun delegatuak eta "pozik" dago "EH Bilduk herritarren iritzia errespetatzen duelako".
Miguel Angel Paez Ogasun eta Ekonomia Sustapenerako delegatuak EH Bilduren udal taldeak egindako balorazioari erantzun zion atzoko egunean. Koalizioko kideak “herritarren iritzia errespetatuko dutelako eta aldeko botoa emango dutelako pozik” zegoela adierazi zuen Paezek.
Parte hartze prozesuak “zeinek gobernatzen duen kontutan hartu gabe” urtero aurrera eraman ahal izateko “haren eskuan –udalaren– dagoena egin dezala urtero halako prozesu bat garatzeko” eskatu zuen koalizio abertzaleak. Horren aurka agertu da Paez esanez, “parte hartze librea eta baldintzarik gabekoa nahi dute, baina jendea proposamen bat defendatzeko antolatzen bada hori ekiditeko arauak eta oztopoak jartzeko eskatzen digute”. Ildo horretan alkateordearen arabera “hori egin izan bagenu, prozesua zuzentzea leporatuko ziguten. Onena izango da herritarrei erantzutea, zein taldekoak diren edo ez diren alde batera utzita eta boto bakoitza errespetatzea”.
Hori horrela, bi parte hartze prozesu garatuta instituzioen artean akordioetara iristea onuragarria izango zela iritzi zion EH Bilduk. Paezen arabera aldiz udalak ez du laguntzarik behar “bere prozesu parte hartzaileak lantzeko. Gainera, erantzun positiboa izan du herritarren artean eta ez dugu beste erakunderik behar, nork gobernatzen duen alde batera utzita, auzotarren artean parte hartze kontsultak egiteko”.
