Abiadura neurtzeko panel bat jarri du udalak Anaka kalean
Abiadura "mantsotzeko" eta "segurtasuna bermatzeko" jarri dutela panela adierazi du Laborda Mugikortasun delegatuak 30km orduko iniziatibaren barruan.
Irungo Udaleko Mugikortasun delegatu Cristina Labordak gaur jakinarazi duenez, abiadura adierazten duen panel informatibo bat kokatu dute Anaka kalean, erdialderako norabidean. 30km orduko iniziatibaren barruan abiadura “mantsotzeko” eta “segurtasuna bermatzeko” neurri bat dela ziurtatu du zinegotziak.
Hala, 2015aren hasieran beste lau panel informatibo jarriko dituztela Irunen zehar ere esan du Labordak. Horietako batek Anaka kalearen goranzko norabidean kokatuko dute; beste bi Euskal Herria hiribidearen bi norabideetan; eta azkena, Dario de Regoyos kalean.
Hori horrela, 30km orduko muga igarotzen ez bada panela berde ageriko da; 30 eta 45km orduko abiaduren artean gorria izango da seinalea eta 45km ordutik gora arreta seinale bat ikusi ahal izango da “baimendutako muga modu zabalean gainditzen dela jakinarazteko”.
