Arantxa Lizeagaren margoak jasoko ditu Modottik hilaren 31ra arte
Olio margoak eta akuarelak bildu ditu hondarribiarrak. Larunbatean inuguratuko dute erakusketa, 12:00etan.
Modotti tailerrak pintura erakusketa antolatu du aspaldiko partez, abendurako. Kale Nagusiko tailerrak jaso dituen azken erakusketak argazkilaritzari lotutakoak izan dira, baina oraingoan Arantxa Lizeaga hondarribiarraren olio margoak eta akuarelak daude bertan erakusgai.
Dagoeneko Lizeagak jarriak ditu koadroak Modottin, baina larunbatean (hilak 6) inaugurazio ekitaldia egingo du, 12:00etan. Egileak berak onartu du “emozioetatik” abiatuta margotzen duela: “Margolaritzaren artea ustekabean aurkitu nuen, eta gaur egun nire pasioa da. Margo bakoitzean nirea den zerbait dago, margotzen dudana emoziotik egiten baitut, emandako pintzelkada bakoitza gozatu eta sentitu egiten dut”.
1993an Adur-Bidasoa lehiaketa irabazi zuen hondarribiarrak eta hainbat aldiz erakutsi du Irunen, etxean gutxiago. Urtezar egunera arte aukera dago bere margoketa ezagutzeko, tailerreko ohiko ordutegian: larunbat eta jaiegunetan, 11:00etatik 14:00etara, eta lanegunetan 17:30etik 20:00etara (ostegunetan itxita). Informazio gehiagorako bisitatu Modottiko webgunea.
Lizeagaren lanetako bat
