Garaipen garrantzitsua lortu du Hondarribia Eskubaloia taldeak
27-18 irabazi dio Askartzari eta hiru puntuko aldea ireki du bizkaitarrekiko. Ereintza aurreratu dute eta azkena, Urdaneta, dagoeneko lau puntura dago.
Hondarribia Eskubaloiak garaipen argia lortu zuen etxean Quiron Askartzaren kontra (27-18), Espainiako Lehen Mailako 11. jardunaldian. Denboraldiko hirugarren garaipenari esker, Javi de la Hazak entrenatzen duen taldeak Ereintza aurreratu du eta 12. jarri da sailkapenean. Azkena dagoen Urdanetari lau puntu ateratzen dizkiote berdeek, eta hiru puntu azkenaurrekoari, Askartzari.
Hasieratik aurreratu ziren etxekoak (3-1, 5. minutuan), eta tarte horri eusten jakin zuten. Atsedenaldirako 5 minutu geratzen zirenean bizkaitarrak gol batera hurbildu ziren (9-8), baina De la Hazarenek lau gol sartu zituzten jarraian, eta bost goleko errentarekin joan ziren aldagelara (13-8).
Bigarren zatia oso kontzentratuta hasi zuen Hondarribiak, eta 4-0ko partziala ezarri zuen markagailuan (17-9, 40. minutuan). Hortik aurrera ez zen ia ezer aldatu, eta hondarribiarrek garaipen inportantea lortu zuten, maila eusteko borrokan aurkari zuzena izan baitaiteke talde bizkaitarra.
Hondarribiarren golegile nagusiak Gorka Wamba (7 gol), Fernando Rincon (5) eta Iñigo Gomez (5) izan ziren. Askartzakoen artean, jokalari batek, Xabier Gonzalezek, taldearen golen erdiak sartu zituen (9).
