Aurtengo banderak bedeinkatuko ditu bihar arraun elkarteak
Arraunlariak 12:10an abiatuko dira elkartetik, parrokia aldera. Marije Zapirain omenduko dute aurten, Eñaut Labaien zenaren ama. Eguraldia lagun, historiako trapu garrantzitsuenak erakutsiko dituzte San Pedro kalean, eguerdian, eta bazkalostean, beheko mailetako entrenatzaileei urrezko intsignia jarriko diete.
Hondarribia Arraun Elkarteak (HAE) 2014an lortutako banderen bedeinkapen ekitaldia egingo dute bihar, larunbatez. Hamabiak eta hamarrean arraunlariz, zuzendaritzako kidez eta Arrantzaleen Kofradiako ordezkariez osaturiko taldea abiatuko da elkartetik, Kale Nagusirantz.
Aurretik, Abiyuan fanfarrea joango da, bidea irekitzen. Eta udaletxe parera iritsita, udalbatza batuko zaie, parrokiara joateko. Tenpluan, 12:30ean meza hasiko da eta ondoren bedeinkatuko dituzte denboraldian irabazitako trapuak.
Marije Zapirain izango da aurtengo ama besoetakoa, Eñaut Labaienen ama. 2010. urtean hil zen Labaien, lan istripu batean. 2006ko liga irabazi zuen taldeko partaidea izan zen, eta aurten, Ama Guadalupekoak berriro liga irabazi duenean, arraun elkarteak gaztearen ama omenduko du.
Banderen bedeinkapenaren ondoren, ohi bezala, kofradiara eramango dituzte, eta han gordeko dituzte betirako. Baina lehenago, eguraldiak horretarako aukera ematen badu, arraun elkarteak historian lorturiko bandera garrantzitsuenak San Pedro kalean zabalduko ditu. Noski, trapu horien artean Kontxako eta ligako banderak egongo dira.
Urrezko intsignia jartzea
Biharko egunez elkarrekin bazkalduko dute arraun elkartea osatzen duten kide guztiek. Eta bazkari horretan harrobiko lana saritu nahi dute, beheko mailetako entrenatzaileei klubeko urrezko intsignia jarriz. “HAEk beti garrantzia handia eman dio harrobiko lanari. Horregatik, San Miguel Liga irabazi duen taldeko hamahiru arraunlari harrobikoak izanik, elkarteko neska mutilak formatzen urte pila daramaten bost pertsonari urrezko intsignia jartzea erabaki dugu”, argitu du zuzendaritza batzordeak.
Josema Arrizabalaga, Joserra Oiartzabal, Celes Bratos, Martin Goikoetxea eta Kalixa Silanes izango dira omenduak. Zuzendaritzak “itzalean egindako lana” saritu nahi izan du, “inoiz geratzen ez den fabrika hori delako arrazoietako bat, gure klubak azken urtetan lortzen ari den sari guzti horiek lortzeko”.
Hamalau bandera irabazi ditu aurten HAEk
2014ko banderak
- Aulki mugikorreko Kadete Mailako Gipuzkoako Liga.
- Aulki mugikorreko Gazte Mailako Gipuzkoako Liga.
- XXII. San Jose Saria (Astilleroko traineruen jaitsiera eta 8+).
- Getariako trainerillen IV. Antxoa Eguna Bandera.
- Mutilen Senior Mailako Trainerillen Gipuzkoako Liga.
- Mutilen Senior Mailako Trainerillen Gipuzkoako Txapelketa.
- Lekeitioko traineruen XXXVI. Ikurriña.
- Marina de Cudeyoko IX. Bandera (TKE).
- La Caixa II. Bandera (TKE).
- Getxoko estropaden XXXVI. Ikurriña (TKE).
- Moañako Bandera (TKE).
- Playas de Noja II. Bandera.
- Bilboko V. Bandera (TKE)
- Bermeo Hiriko XXXII. Bandera (TKE)
