Hitzordu bikoitza finkatu du Kabigorrik aste honetarako
Eider Astrainen Akuarelak erakusketaren inaugurazioa izango da etzi ostegunarekin. Larunbatean aldiz, Eneritz Furyak eta Pelax bakarlarien kontzertua antolatu du Bidasoaldeko Ateneoak.
Kabigorri Bidasoaldeko Ateneoak Eider Astrainen Akuarelak goiburuko erakusketa hartuko du etzitik aurrera eta abenduaren 6ra bitartean. Artelanen erakusketa inauguratzeaz gain, lunch bat eskainiko da bertaratzen direnentzat, 19:30etik aurrera. Arte Ederrak ikasi zituen Astrainek eta geroztik, hainbat erakusketa egin ditu Gipuzkoako Artisten Elkartearen eskutik. Olioa, akuarela eta teknika mistoak lantzen ditu artista donostiarrak.
Larunbatean hilaren 15ean bestalde, Eneritz Furyak eta Pelax bakarlarien emanaldia izango da, 23:00etatik aurrera. Kasernarat taldeko kide irundarra da, baina bakarka aritzea ere gustuko du Furyak ezizenaren atzean ezkutatutako Eneritz Duesok.
Pelaxi dagokionez, Egian bizi den musikaria da eta hainbat taldetan jo ondotik, bakarlari gisa aritzen da donostiarra. Blues, folk eta rock doinuak uztartzen ditu eta gaur egun, Iñigo Irazokiren Sarako estudioan bere lehen lanari forma ematen ari dio.
