Herkulesen 12 probak, museo gida bat baino zerbait gehiago
Oiasso Erromatar Museoak diseinatutako aplikazioa da, eta joko bat balitz bezala, museoaren edukiak era didaktikoan eta dibertigarrian ezagutzeko aukera ematen dio familia osoari.
Teknologia berrien aldeko apustua egin du Oiasso Erromatar Museoak eta ildo horretan, Herkulesen 12 probak izeneko mugikorrerako aplikazioa museoa bisitatu nahi dutenen eskura jarri du, Google Play-n eta Apple Store-n, debalde. Museoaren harreran eskuragarri dauden tabletekin ere erabil daiteke aplikazioa.
App-ak “anfitrioi gisa jarduten du jokoan”, adierazi dute museoko arduradunek “bisitarien jakin mina pizteko eta edukietara modu didaktikoan, parte hartzailean eta atseginean sartzeko”. Hala, senideen artean elkar eragiteko aukera eskaintzen du aplikazioak, zalantzak argitzen ditu eta eztabaida ahalbidetzen du. Joko moduan diseinatuta dagoenez, txikienak proba denak gainditzera motibatzen ditu, historiaren gaineko ezagupenak bereganatuz.
Jokoa balitz bezala
Jaime arkeologo birtualak irekitzen du aplikazioa. Familiarekin edo lagunekin hark proposatutako enigmak asmatu edo jokoak praktikatu ahal izango dira, eta bide batez, museoko zenbait pertsonaiek proposatutako erronkak gainditu beharko dituzte bisitariek; era dibertigarrian beti ere. Hala, Herkulesen 12 probak gaindituz gero, arkeologo diploma eskuratuko dute parte hartzaileek.