Fermin Muguruzak 'Black is beltza' eleberria aurkeztuko du Bilbon
https://www.youtube.com/watch?v=tZc4_kukT-4 Etzi ostegunarekin finkatu dute aurkezpenerako hitzordua Bilboko Alhondigan. Nobela grafikoa argitara emango dute oraingo honetan Muguruzak, Harkaitz Cano idazleak eta Jorge Alderete ilustratzaileak, eta horrekin batera, hainbat jarduera paralelo aurreikusi dituzte.
Iruñeko buruhandiak. New York. 1965. Hortxe Fermin Muguruzaren lan berrian kokatzeko testuingurua. Harkaitz Cano idazlearekin eta Jorge Aldarete ilustratzailearekin batera ekoiztutako Black is beltza eleberri grafikoa aurkeztuko du oraingo honetan musikari irundarrak. Etzirako ostegunarekin finkatu dute aurkezpena, Bilboko Alhondigan. Otsailaren 8ra bitartean hala ere han-hemenka aurkeztuko dute egileek proiektua.
Iruñeko buruhandien eta erraldoien konpartsak 1965ean –lotura ingelesez– Erakusketa Unibertsalaren barruan, New Yorkeko 5. Etorbide ospetsuan zehar egindako desfilea aitzakiatzat hartuta ekintza eta espioitza istorio bat eraiki du Muguruzak. Musika, amodioa eta iraultza nahasteaz gain, zinemagintzaren genero ezberdinak eta ikus-entzunezko aurrerapausoak uztartu dituzte horretarako egileek.
Konpartsaren argazki hura ikusi zuen Muguruzak 2000. urtean Euskaldunon Egunkarian, eta argazki oinean irakur zitekeenaren arabera, azalaren kolore medio bi erraldoi beltzei desfilatzeko debekua ezarri zieten. “Hori guztia irakurri eta berehala, argi ikusi nuen hor istorio bat zegoela”, adierazi du Muguruzak.
Handik abiatuta, Manex Unanue pertsonaiaren istorioa eraikitzen hasi zen Muguruza. Bertan, 60ko hamarkadaren erdialdetik aurrera izandako hainbat gertakari historikoen errepasoa egiten du Malcom X-en heriotzetik hasita, Che Guevararen ekintzetara, eta Francoren diktaduratik igaroz.
Jarduera paraleloak
Nobelaren aurkezpenarekin batera zenbait jarduera paralelo izango dira. Hala, proiektuaren erakusketa inauguratuko dute aurkezpen egunean. Bertan, eleberria osatzeko irundarrak baliatutako prentsa artikuluak, ikus-entzunezko materiala, nobelarako erabilitako hasierako marrazkiak…
Horrez gain, master classak, ikus-entzunezko proiekzioak, kontzertua eta solasaldiak izango dira. Jarduera guztien xehetasunak ezagutzeko bertan sar daitezke interesatuak.
Proiektuaren nondik norakoak atxikitako dokumentuan ikus daitezke.
‘Black is beltza’
