39 lagunek kale gorrian edo leku ez duinetan lo egiten dute Irunen
Eudelek, Irungo Udalaren Ongizate arloak eta 65 boluntariok herritar horiek identifikatzeko ikerketa batean parte hartu dute; denera, 32 gizon eta 7 emakume aurkitu zituzten egoera horretan urriaren 29tik 30erako gauean.
Irungo Udalaren Ongizate arloak eta Eudelek antolatuta, elkarte ezberdinetako boluntarioak eta herritar arruntak kalera atera dira kale gorrian edo leku ez duinetan lo egiten duten lagunak zenbatzeko asmoz. 65 boluntariok parte hartu dute denera zenbaketan, urriaren 29tik 30erako gauean, 22:00etatik 02:00ak bitartean.
Bildutako datuen arabera, 39 lagun daude kale gorrian Irunen; 32 gizon eta 7 emakume. Gizarte bazterketa pairatzen duten 39 herritar horietatik 15 bide publikoan aurkitu zituzten eta beste 24k, etxebizitza gisa ez egokitutako lekuetan.
Zenbaketan parte hartu zuten boluntarioak, zenbait nozio jasotzeaz gain, galdetegi bat eraman zuten bazterketa pairatzen duten herritarren egoera hobeto ezagutzeko xedearekin. Horren arabera, lagun eta senide arteko harremanak, egoera administratiboa, osasuna… inguruko datuak jaso zituzten.
EAE mailako ikerketa
Euskal Autonomia Erkidegoan etxebizitza bazterketa egoera larrian bizi diren lagunen gaineko ikerketa argitara emango du Eusko Jaurlaritzak 2015ean. Hori dela eta, EAEko hainbat udalerrietan egoera horretan dauden lagunen kopurua eta horien profila identifikatzeko saiakera egiten ari dira Eudel eta tokiko gobernu ezberdinak. EAEko biztanleria nukleo handietan garatzen ari dira ikerketa eta ildo horretan, halako egoeran dauden lagunen errealitatea ezagutu nahi du Eusko Jaurlaritzak.
