Irungo Lapurriturriko informazio gunea 515 pertsonak bisitatu dute udan
Tarte horretan egin diren zortzi jardueretan 137 pertsonek parte hartu dute. Bisitari gehienak Irungoak eta inguruko herrietakoak izan dira.
Irungo Udalak bultzatu eta Behemendi Landa Garapenerako Elkarteak kudeatzen duen Lapurriturriko informazio guneak 515 pertsona jaso ditu udan. Aste Santuan eta udan (uztailaren 1etik irailaren 30era arte larunbat eta igandetan) izaten da zabalik gune hori. Aiako Harriko informazioa lor dezakete bertan interesdunek.
515 bisitari horietatik %27 irundarrak izan dira, eta %26 izan dira inguruko herrietakoak. Frantziako Estatutik %19 izan dira bisitariak (Ipar Euskal Herrikoak eta Frantziakoak ez ditu ezberdindu Irungo Udalak).
Udan zabalik egon den bitartean zortzi jarduera ezberdin programatu dituzte Lapurriturrin. Horietan 137 pertsonak parte hartu dute, denak inguruko animaliak eta flora ezagutzeko.
Datuak eskuan, Miguel Angel Paez Irungo Udaleko Ingurumen ordezkariak esan du gunearen funtzionamendua egokia dela, eta haren edukiak indartzeko asmoa dutela udaletik, “horregatik Behemendirekin elkarlanean jarraituko dugu berritasunen bila”.
2006an zabaldu zuten Lapurriturriko gunea. Erlaitz mendiraren tontorrean dago.
