Trintxerpekoek lehia polita burutu dute Ondarroarekin eta ohorezko txandako bi taldek baino denbora hobea egin dute; San Pedro B ez da fin ibili eta azkenaurreko tokian sartu da. KAE2n, Hondarribia hirugarren geratu da asteburuko bi estropadetan eta Hibaikak bosgarren postua lortu du Santurtzin.
Illunbe eta Ondarroa, lehen ziabogan maniobra egiten
Zumaiak irabazi zuen larunbatean San Pedro Arraun Elkarteak antolatutako Pasaiako XXX. Ikurrina, KAE1eko Ligako hirugarren proba. Joan den asteburuan Elantxoben gertatu bezala, Zumaiako Telmo Deun trainerua izan zen indartsuena San Pedroko uretan, baina ozta-ozta nagusitu zen, 32 ehuneneko atera baitzizkion bigarrenari, Getariari.
Hirugarren tokian Ondarroa sartu zen, bigarren txandan nagusitu eta gero. Illunbek lehia polita burutu zuen bizkaitarrekin eta, ezustean, ohorezko txandako Lekittarra eta Elantxoberen aurretik bukatu zuten estropada, laugarren tokian. Emaitza horri esker, Elantxoberekin berdindu eta sailkapen orokorrean bosgarren jarri dira Trintxerpekoak.
San Pedrok ez zuen disfrutatu etxean
San Pedro elkarteko bigarren ontziak ez zuen etxean bere egunik onena eduki, eta orain arteko emaitza kaskarrena egin zuten, hamaikagarren postua, Castroren aurretik. Lehen ziabogaraino borroka polita izan zuten Santoñarekin eta elkarrekin egin zuten maniobra, baina hortik aurrera sasoi falta nabaritu zitzaien. Denboraldia hasi berria da eta aukera gehiago izango dituzte emaitza hobeak lortzeko.
Hurrengo asteburuan estropada bakarra jokatuko dute KAE Ligako lehen multzoko ontziek, Donostian. Larunbatean izango da eta helburu desberdina izango dute Pasaiako bi ontziek. Illunbek erakutsi nahiko du San Pedron geratutakoa ez zela kasualitatea izan; San Pedro B, aldiz, disfrutatzera irtengo da eta, ahal bada, bere txanda irabaztera.
KAE2 Ligan, Zarautz nagusi
KAEko 2. multzoan bi estropada antolatuak zeuden astebururako, Santurtzin eta Plentzian, eta bietan emaitza bera izan da lehen hiru postuetan. Zarautzek irabazi ditu asteburuko bi probak, hurrenez hurren, Deusto-Bilbao eta Hondarribia Bren aurretik. Ligako lehen bi estropadak ziren eta, hortaz, Zarautz da KAE2ko lehen liderra.
Santurtzin aise nagusitu ziren zarauztarrak, bigarrena baino 28 segundo lehenago helmugara iritsita; Hondarribiak Deustok baino bi segundo gehiago behar izan zituen estropada burutzeko. Hibaika oso ondo lehiatu zen larunbatean eta bosgarren postuan sailkatu zen, laugarren Getxotik segundo bakar batera.
Igandean Areetako XVII. Bandera zegoen jokoan eta Zarautzek irabazi zuen, bezperan bezala, baina aurkariei tarte txikiagoa aterata. Hiru segundo atzerago sartu zen Deusto eta zazpira Hondarribia. Hibaikak ez zuen larunbateko arraunketa aurkitu eta 10. tokian iritsi ziren helmugara, irabazlearengandik minutu eta erdira.
Datorren asteburuan KAE2 Ligako beste bi estropada jokatuko dituzte, larunbatean Donostian, eta igandean, Hibaikak antolatutakoa Pasaian.
